Kaladze: «Qazprom» Gürcüstana ultimatum verib (YENİLƏNİB)

Gürcüstanla danışıqlar pozulacağı təqdirdə Rusiyanın “Qazprom” şirkəti Gürcüstan ərazisindən Ermənistana qaz nəqlinə son qoymaqla hədələyir və Ermənistanı İrandan qazla təchiz edəcək. Bu barədə dünən “Rustavi-2” teleşirkətinin efirində Gürcüstanın energetika naziri Kaxa Kaladze bildirib.

Onun sözlərinə görə, “Qazprom” Ermənistana qaz tranzitinə görə ödəniş prinsipini dəyişdirməyi təklif edir. Hazırda tranzit həcminin 10%-i Gürcüstanda qalır, amma indi “Qazprom” buna görə pul ödəmək istəyir.

“Onlar belə bir şərt qoşduqda biz qəti etirazımızı bildirdik, amma bizə birbaşa dedilər ki, Rusiyanın Ermənistana qazı İran vasitəsilə göndərmək üçün real imkanı var”, deyən Kaladze bunu “ultimatum” adlandırıb.

Kaladzenin sözlərinə görə, bu hədə realdır və “Qazprom” kiçik investisiyalardan sonra İran vasitəsilə Ermənistana 1 mlrd. kubmetrə yaxın qaz nəql edə bilər. Bu hədənin həyata keçirilməsinin ağır nəticələri olacaq. Gürcüstan gündə iki milyon yarım kubmetr qazdan məhrum olacaq, bir halda ki, gündəlik istehlak minimum 11,5 milyon kubmetr təşkil edir.

“Belə olan halda ölkədə enerji böhranı yaranacaq, onun ardınca siyasi böhran gələcək: hökumət əhali üçün təbii qaz tariflərini artırmaq məcburiyyətində qalacaq”, deyə o bildirib.

Kaladze hesab edir ki, tranzitə görə ödənişi pulla almaq sərfəli deyil, “belə ki, bu pula eyni miqdarda qaz almağın mümkün olacağına zəmanət yoxdur”. Nazir bunun niyə mümkün olmayacağını bildirməyib. Kaladze həmçinin deyib ki, Gürcüstan vasitəsilə tranzitdən imtina ediləcəyi təqdirdə Ermənistan təxminən bir il qaz defisiti yaşayacaq.

Maraqlıdır ki, Kaladze bu bəyanatı “Qazprom eksport” direktoru Elena Burmistrova ilə görüş üçün Vyana getməzdən əvvəl verib.

Moskva beynəlxalq bazarda qaz qiymətlərinin ucuzlaşmasını nəzərə alaraq, Ermənistana qaz tranzitinə görə pul ödəməyi qərara alıb. Məhz buna görə Rusiya tərəfi qaz tranzitinin əvəzini qazla deyil, pulla ödəmək istəyir.

Qeyri-rəsmi məlumatlara görə, Gürcüstan hakimiyyəti ehtiyacı olan qazın 50%-ni “Qazprom”dan, bir o qədərini də Azərbaycandan almağı planlaşdırır. Lakin rəsmi şəxslər bu iddiaları təkzib ediblər.

Kaladzenin bu müsahibəsindən Bakının Gürcüstana ehtiyacı olduğu qədər qazı münasib qiymətə verməyə hazır olduğunu bəyan etdiyi halda, Gürcüstan hakimiyyətinin Rusiyadan qaz tədarükünü itirməkdən niyə qorxduğu aydın olmayıb. -02D-

2016 Yanvar 21 (Cümə axşamı) 14:15:37

Ötən gün Vyanada Gürcüstanın energetika naziri Kaxa Kaladzenin “Qazprom” nümayəndələri ilə növbəti görüşü başa çatıb. Sazişə nail olunması üçün iş prosesi davam edir, Gürcüstanın energetika naziri çərşənbə günü bildirib.

“Vyanada “Qazprom” nümayəndələri ilə gürcü tərəfinin görüşü olub. Danışıqların mövzusu dəyişmir və tərəflər üçün əlverişli sazişin əldə olunması məqsədilə iş prosesi davam edir”, - nazirliyin bəyanatında qeyd olunub.

Gürcüstanda ekspertlər və müxalifət naziri tənqid edərək bildirirlər ki, “Qazprom” ilə əməkdaşlıq Gürcüstanı enerji müstəqilliyindən məhrum edəcək. Gürcüstan hökumətinin “Qazprom” ilə danışıqlarına son qoyulması tələbilə etiraz aksiyaları sistematik olaraq keçirilir.

Xatırladaq ki, K.Kaladze “Qazprom”dan qaz alqısına və Azərbaycandan qazın payının azaldılmasına lobbiçilik edir. Hazırda Gürcüstan qazının idxalının 90%-ni Azərbaycan qazı təşkil edir.

Yanvarın ortalarında SOCAR prezidenti Rövnəq Abdullayev Gürcüstanın hökumət başçısı ilə danışıqlar aparıb və sonuncu əmin edib ki, söhbət Azərbaycan qazından imtinadan getmir, yalnız ixracın diversifikasiyasından gedir. Lakin bu fikirlər qeyri-inandırıcı və əsassızdır, çünki Rusiya qazı Azərbaycan qazından bahalıdır. 02D-