Kazaryanlarla Əsgərov və Quliyev mübadilə ediləcək?

Bakı/20.09.19/Turan: Sentyabrın 19-da rəsmi Yerevan Qırmızı Xaç Komitəsi vasitəsilə Azərbaycandan iki azərbaycanlının iki erməni ilə mübadiləsi ilə bağlı rəsmi təklif alıb.

Bu barədə bu gün Yerevanda keçirilən mətbuat konfransında Ermənistanın müdafiə naziri David Tonoyan Azərbaycan tərəfin Bakının Ermənistan vətəndaşları Karen Kazaryan və Araik Kazaryanı Qarabağda mühakimə edilmiş azərbaycanlılar Dilqəm Əsgərov və Şahbaz Quliyevlə dəyişdirməyə hazır olması barədə bəyanatını şərh edərkən bildirib.

Nazir qeyd edib ki, bəzi məlumatların dəqiqləşdirilməsi üçün əlavə işə ehtiyac var, bu məlumat əldə edildikdə Ermənistan tərəfi öz bəyanatını verəcək.

"Biz prinsipcə vətəndaşlarımızın öz evlərinə qayıtmasına qarşı deyilik və bu prosesə şərait yaradacağıq. Bu, sırf humanitar əməliyyatdır", deyə o bildirib.

Mübadilə variantı istisna edilməyib? Bu suala cavabda David Tonoyan deyib: "Bunun Dağlıq Qarabağın suveren qərarı olduğunu istisna etmirəm".

Xatırladaq ki, bir müddət əvvəl Qarabağ separatçılarının nümayəndəsi David Babayan Əsgərov və Quliyevin Karen və Araik Kazaryanlarla dəyişdirilməsi ehtimalını istisna edib. O, öz mövqeyini azərbaycanlıların qatil olması ilə əsaslandırıb.

Amma Tonoyanın bəyanatından göründüyü kimi, Qarabağda müəyyən qanunverici qərar qəbul edilə, bu qərar əsasında azərbaycanlılar azad edilə bilər.

Bu günlərdə Ukrayna və Rusiya arasında analoji mübadilə baş verib. Orada iki ölkə lideri müraciətlərinə əsasən iki rus və iki Ukraynalını əvf edib. Ermənistan tərəfi də Əsgərov və Quliyevin "Qarabağ prezidentinə" əvf məktubu yazmasına, diversiya, qətl törətdiklərini etiraf etməsinə və əvf edilmələrini xahiş etməsinə nail olmağa çalışa bilər. -02D-