Keçmiş baş prokuror müxalifətlə əlaqələrinə görə hədələnir

Mayın 30-da saat 18.58-də 55 237 0202 nömrəli mobil telefondan Azərbaycanın keçmiş baş prokuroru Əli Ömərova təhdidedici zəng olub. 

Ə.Ömərov Turan-a bildirib ki, özünü polis polkovniki kimi təqdim edən şəxs onu təhqir edib, müxalifətin ünvanına söyüşlər söyərək ona xəbərdarlıq üçün zəng etdiyini bildirib.

“Mən Daxili İşlər Nazirliyinin polkovnikiyəm. Keçmiş baş prokuror olmağına baxmayaraq, keçmiş daxili işlər naziri İsgəndər Həmidov kimi sənin də başına torba salıb həbs edərik. Uşaqlarına, ailənə qarşı cinayət işi qaldırıb həbsə atarıq, işgəncə verərik. Sənin Novxanıda müxalifətin mitinqində nə işin var? Sən bu yoldan əl çək”, -  özünü polkovnik kimi təqdim edən şəxs Ə. Ömərovu hədələyib.   

Ə.Ömərov bundan sonra ona zəng edənin kim olduğunu dəqiqləşdirməyə çalışıb.  “Həmin şəxs yenidən DİN-in polkovniki olduğunu təsdiq etdi və mənə xəbərdarlıq üçün zəng etdiyini bildirdi. Mən ona sual etdim ki, Azərbaycanın hansı qanunu ilə Cümhuriyyət bayramında iştirak etmək, insanlarla görüşmək qadağan edilib”. 

Ə. Ömərov bununla bağlı prezident İlham Əliyevə, daxili işlər naziri Ramil Usubova teleqram vurduğunu, Daxili İşlər Nazirliyinin “102 xidməti”nə zəng etdiyini və Amerika səfirliyinə müraciət etdiyini bildirib. “Bu,  quldurluqdur. Həmin şəxs aydınlaşdırılıb, qanunauyğun olaraq cəzalandırılmalıdır”. 

Turan agentliyi Əli Ömərova zəng edilmiş telefona zəng vurub. Həmin telefon nömrəsi mövcuddur, lakin telefona müvəqqəti olaraq zəng çatmır.

DİN-in mətbuat xidmətindən Turan-a bildirilib ki, nəinki polis polkovnikinin, hətta gənc polis zabitinin vətəndaşa zəng edib bu tonda danışması inandırıcı deyil. Bununla yanaşı vətəndaş müraciət edibsə araşdırılıb ona cavab veriləcək. -03B-