Keçmiş deputat Hüseyn Abdullayevin növbəti məhkəməsi başlayıb

Avqustun 15-də Bakı Ağır Cinayətlər Məhkəməsində parlamentin keçmiş deputatı Hüseyn Abdullayevin işi üzrə hazırlıq iclası keçirilib. İclasa hakim Azər Tağıyev sədrlik edib.

Hüseyn Abdullayevin vəkili Günay İsmayılovanın sözlərinə görə, Abdullayevin  vəziyyəti qənaətbəxş olmasa da, özü prosesdə iştirak edib. Müdafiə tərəfi Abdullayevin səhhətində ciddi problemlərin  olduğu üçün onun tibb müəssisəsinə köçürülməsi və ev dustaqlığına buraxılması barədəı vəsatət qaldırıb.

Məhkəmə ev dustaqlığına buraxılmaq barədə vəsatəti təmin etməyib, lakin Penitensiar Xidmətin tibb müəssisəsinə köçürülməsi barədə vəsatəti təmin edib. Növbəti iclas avqustun 22-nə təyin edilib.

6 illik həbs cəzasının bitməsinə 47 gün qalmış, bu il martın əvvəlində ona qarşı yeni ittiham irəli sürülüb. O, cinayət yolu ilə əldə edilmiş pulların leqallaşdırılmasında (Cinayət Məcəlləsinin 193-1.3.2-ci maddəsi) ittiham olunur. Bu il martın 4-də Binəqədi Rayon Məhkəməsi keçmiş deputatın 4 ay müddətinə həbs olunması barədə qərar qəbul edib.

Yeni ittihama əsasən Hüseyn Abdullayev 2006-cı ildən 2014-cü ilə qədər 6 milyon manatın yuyulmasında ittiham olunur, baxmayaraq ki, istintaq onun 2000-2018-ci illərdəki hərəkətlərini araşdırıb. Yeni ittiham üzrə  Abdullayevi 7 ildən 12 ilə qədər həbs təhlükəsi gözləyir.

*Hüseyn Abdullayev 1990-cı illərdə neft və neft məhsulları üzrə biznes sahəsində qabaqcıl mövqelər tutub. Onun nəzarətində olan qruplar müxalifətin etirazlarının dağıdılmasında iştirak ediblər. 2005-ci ildə Abdullayev parlamentin deputatı olub və Nazirlər Kabinetinin fəaliyyətini tənqid edib. 2007-ci ilin martında parlamentin iclasında deputat Fəzail Ağamalı Abdullayevi davaya təhrik edib. Amma təkcə Abdullayev cəzalandırılıb. Əvvəlcə həbs edilib, sonra xuliqanlığa görə 2 il müddətinə şərti azadlıqdan məhrumetmə cəzasına məhkum edilib.

2013-cü ildə Azərbaycandan mühacirət edib. Bir müddət sonra ona qarşı vergidən yayınma ittihamı ilə cinayət işi açılıb.

2018-ci il aprelin 22-də Türkiyədə saxlanılıb və Azərbaycana ekstradisiya edilib. Türkiyəyə isə Almaniyadan gedib.

Bakıda Cinayət Məcəlləsinin 192.2.2 (böyük gəlir əldə etməklə qanunsuz sahibkarlıq), 178.2.1 (fırıldaqçılıq), 178.2.2, 178.2.4 (fırıldaqçılıq), 182.2.1 (əvvəlcədən əlbir olmuş şəxslər tərəfindən hədələmə yolu ilə pul tələb etmə), 182.2.2 (eyni əməllər təkrar törədildikdə) və 182.2.4-cü (eyni əməllər, zərərçəkmişə böyük ziyan vurmaqla törədildikdə) maddələrilə ittiham edilib. Nəticədə 6 il azadlıqdan məhrum edilib.

2020-ci ilin avqustunda Birləşmiş Millətlər Təşkilatının Özbaşına Həbslər üzrə İşçi Qrupu Hüseyn Abdullayevin dərhal azadlığa buraxılması barədə qərar çıxarıb.