Keçmiş Sovetski ərazisində yeni yol-nəqliyyat infrastrukturu (yenilənib)

İlham Əliyev bu gün keçmiş Sovetski küçəsi ərazisində Dram Teatrının arxasında tikiləcək yeni yol-nəqliyyat infrastrukturunun təməlini atıb.

"Azəravtoyol" sədri Saleh Məmmədov dövlət başçısına gələcək kommunikasiyalar haqqında məruzə edib.

Onun sözlərinə görə, abadlıq işləri 26 ha ərazidə aparılır.

Bu zaman 23 ha ərazidə yaşıllaşdırma işləri həyata keçiriləcək, 3 ha ərazini isə yeni yollar tutacaq.

Sözügedən ərazidə 3827 yaşayış və qeyri-yaşayış binası sökülüb. Şəhərin mərkəzini Nərimanov prospektinə (keçmiş Sovetski küç.) birləşdirəcək iki yeni geniş yol (M.Əliyev və Füzuli) çəkiləcək. Bəzi digər küçələr də genişləndiriləcək və abadlaşdırılacaq.

2 km-lik Nərimanov prospekti özü də abadlaşdırılacaq və 7 metrdən 17,5 metrə qədər genişləndiriləcək. -02D-

* * *

Cümə axşamı səhər saatlarında dövlət başçısı paytaxtın Yasamal rayonunda Dram Teatrının arxasında bir ildən artıqdır köhnə binaların sökülməsi işlərinin həyata keçirildiyi əraziyə baş çəkib.

24 hektarıq ərazinin təmizlənməsi demək olar ki, başa çatıb və ötən gecədən etibarən ərazi polis mühafizəsinə götürülüb.

Ərazinin keçmiş Sovetski küçəsinə (Nərimanov pr.) birləşən yuxarı hissəsində qurulmuş meydanda bu ərazinin gələcəyini əks etdirən maket və şəkillər yerləşdirilib. 

Meriya və Yasamal rayon icra hakimiyyəti rəhbərliyi görülmüş işlər haqqında hesabat vermək və dəyərli göstərişləri dinləmək üçün sıraya düzülüb.

Qeyd edək ki, bu ərazidə söküntü işləri yaxın bir neçə il ərzində davam edəcək və yenidənqurma işləri 2020-ci ildə başa çatmalıdır.

Paytaxtda meriyası və ölkə hakimiyyəti indiyədək ictimaiyyətə bu ərazidə məhz nə olacağını açıqlamayıb. Yarırəsmi məlumatlara görə, hakimiyyət bu zonada parklar, istirahət zonaları, elit mənzillər tikməyi və yeni yollar çəkməyi planlaşdırır. Bu zaman on minlərlə insan həmin zonadan köçürüləcək. -02В-