Komissiya girovları qaytarmaq istəyir

Bakı/18.09.19/Turan: Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası Ermənistana girovları dəyişmək təklif edib və erməni tərəfindən imtina alıb. Bu barədə Komissiyanın yaydığı məlumatda deyilir.

Məlumatda bildirilor ki, belə təklif hələ 2016-cı ildə edilib. "Azərbaycan Respublikası tərəflərdə saxlanılan əsir-girovların "hamının-hamıya" prinsipi əsasında azad olunması və gələcəkdə əsir-girov götürülən şəxslərin, eyni zamanda meyitlərin 3 gündən gec olmayaraq qaytarılmasını aidiyyəti beynəlxalq təşkilatların vasitəçiliyi ilə 2016-cı ilin aprel ayında Ermənistan Respublikasına təklif etmişdir".

Lakin Ermənistan bu təklifdən və Dilqəm Əsgərov və Şahbaz Quliyevin Ermənistan Respublikasının vətəndaşları olan erməni hərbçiləri Karen Kazaryan və Araik Kazaryanla qarşılıqlı mübadilədən imtina etdi.

Komissiya Azərbaycanın beynəlxalq humanitar hüququn norma və prinsiplərinə daim əməl etdiyini yenidən diqqətə çatdıraraq bildirib ki, 7 sentyabr 2019-cu il tarixdə Rusiya Federasiyası və Ukrayna arasında əsirlərin "hamının-hamıya" mübadiləsinə uyğun olaraq Azərbaycan və Ermənistan arasında əsir-girovların eyni prinsip əsasında qısa müddətdə azad edilməsinə tərəfdar olduğunu bir daha bəyan edib.

D.Əsgərov və Ş.Quliyev 2014-cü ildə Kəlbəcər rayonunda valideynlərinin məzarlarını ziyarət edərkən Ermənistan silahlı qüvvələri tərəfindən girov götürülüb, onların yanında olan Həsən Həsənov qətlə yetirilib. Separatçı "Dağlıq Qarabağ Respublikası"nın məhkəməsi D.Əsgərovu ömürlük, Ş.Quliyevi isə 22 il müddətinə azadlıqdan məhrum edib.

2018-ci ilin iyulun 15-də Azərbaycanın Müdafiə Nazirliyi Ermənistanın kəşfiyyat-diversiya qrupunun dövlət sərhədini keçməyə cəhd göstərməsi haqda xəbər yayıb.

Xəbərdə qeyd edilirdi ki, həmin qrup dövlət sərhədinin Qazax rayonu istiqamətində qoşunların təmas xəttini keçməyə çalışıb.

Nazirlik təxribat cəhdinin qarşısının alındığını, qarşı tərəfin itkilər verərək geri çəkildiyini, qrupun bir üzvünün əsir götürüldüyünü bildirmişdi. Məlumatda əsirin 1984-cü il təvəllüdlü K.Kazaryan olduğu vurğulanırdı.

Bu ilin avqust ayında Azərbaycan tərəfi erməni əsgərin Füzuli rayonundakı hərbi mövqe yaxınlığında saxlanması və onun "fərariliyinin qulluq etdiyi hərbi hissədəki qeyri-insani rəftarla bağlı olmasına" dair bəyanat yayıb.

Azərbaycan tərəfi əsgərin saxlandığını bildirib.

19 yaşlı Araik Kazaryan əslən Ermənistanın Vayotsdzor vilayətindəndir.-0-