Koronavirusla əlaqədar yeni məhdudiyyətlər

Bakı/12.03.20/Turan: ÜST-ün koronavirus (COVID-19) pandemiyasını elan etməsi və infeksiyanın Azərbaycanda yayılması təhlükəsinin qarşısının alınması ilə əlaqədar Azərbaycan elektron vizaların verilməsini dayandırıb.

Bel’ ki, "ASAN Viza" elektron portalında vizaların verilməsi 45 gün müddətinə dayandırılır.

Azərbaycana gəlmək istəyən xarici ölkə vətəndaşları viza almaq üçün ölkənin müvafiq səfirliklərinə və baş konsulluqlarına müraciət etməli olacaqlar.

Viza almaq üçün müraciət edərkən, xüsusən, COVID-19 virusunun geniş yayıldığı ölkələrin vətəndaşlarından COVID-19 virusu testindən keçdikləri haqqında tibbi arayış tələb olunacaq, bu barədə Nazirlər Kabineti yanında Operativ Qərargah bildirib.

Eyni zamanda, hökumət Azərbaycan vətəndaşlarını iki ay ərzində ciddi zərurət olmadan xarici səfərlərdən imtina etməyə çağırıb.

Azərbaycanın Mədəniyyət Nazirliyi ölkənin kitabxana və muzeylərinə girişi qeyri-müəyyən müddətlik məhdudlaşdırıb.

Qafqaz Müsəlmanları İdarəsi ölkənin iki böyük məscidinin - "Təzə Pir" və "Heydər" məscidlərinin mərasim zallarında yas mərasimləri keçirilməsinə müvəqqəti qadağa tətbiq edib. 

Hökumət həmçinin ölkənin bütün ictimai iaşə obyektlərində çoxdəfəlik qəlyanların çəkilməsinin qadağan edilməsi haqqında qərar qəbul edib.

Bu tədbirlər COVID-19-un hava-damcı yolu ilə yayılması ilə əlaqədar görülüb.

Azərbaycanda 15 koronavirusa yoluxma halı qeydə alınıb. Martın 12-də xəstələrdən biri dünyasını dəyişib. -06D-