Kreml terrordan təbliğat kimi istifadə edir: ABŞ Moskvada terror aktından əvvəl edilən xəbərdarlıqların təfərrüatlarını açıqlayır

Martın 7-də Moskva vaxtı ilə səhər saat 11:15-də ABŞ hökuməti adi prosedurlara riayət edərək və müəyyən edilmiş kanallarla Rusiyanın təhlükəsizlik xidmətlərinə yazılı xəbərdarlıq təqdim edib. Bu barədə ABŞ Milli Təhlükəsizlik Şurasının üzvü Con Kirbi cümə axşamı Ağ Evdə jurnalistlərə 22 mart tarixində törədilən terror aktından əvvəl Vaşinqtonun "Rusiya hakimiyyətinə Moskvada terror təhlükəsi haqqında dəqiq və ətraflı məlumat" təqdim etməsindən bəhs edərkən bildirib.

"Bundan başqa, ertəsi gün, martın 8-də biz ictimaiyyət üçün xəbərdarlıq dərc edərək, Amerika vətəndaşlarına Moskvada böyük toplantılarda və konsertlərdə iştirakdan çəkinmələri barədə xəbərdarlıq etdik", deyə Kirbi xatırladıb.

"Səfirliyimizin açıq tövsiyələri, çox güman ki, terrorçuları martın 8-də hücumdan çəkindirib, lakin Rusiya hökumətinə və geniş ictimaiyyətə etdiyimiz xəbərdarlıq bu hücuma görə məsuliyyət daşıyan İŞİD-in yaratdığı terror təhlükəsini dəqiq müəyyən edib", deyə Kirbi qeyd edib.

Kirbinin şərhləri Rusiya məmurlarının terror hücumunda Ukraynanı ittiham etmək cəhdləri fonunda səslənib. İŞİD-K terror qruplaşması məsuliyyəti öz üzərinə götürsə də və hücumla əlaqədar dörd Tacikistan vətəndaşı həbs olunsa da, Kreml Ukraynaya qarşı təcavüzünə bəraət qazandırmaq üçün təqsiri "Qərbin" üzərinə atmağa çalışır. 

Kirbi Rusiyanın "təqsiri Ukraynaya, ABŞ-a və digərlərinə yıxmaq" cəhdlərini "cəfəngiyyat" və "təbliğat" adlandırıb.

Ağ Ev və Dövlət Departamenti rusların 22 mart terror hücumunun qarşısını almaq üçün onlara verilmiş məlumatlardan istifadə etməməsinin səbəblərini başa düşmədiklərini bəyan edib. Bundan başqa, məlum olub ki, 2023-cü ilin payızından indiyədək ABŞ Moskvanı potensial terror təhlükəsi ilə bağlı ilk dəfə məlumatlandırmır. "7 mart tarixli bu xəbərdarlıq 2023-cü ilin sentyabrından etibarən ABŞ hökumətinin Rusiyaya təqdim etdiyi çoxsaylı xəbərdarlıqdan biri idi", deyə Kirbi bildirib.

Əvvəlki xəbərdarlıqlar da potensial İŞİD təhlükəsi ilə bağlı idi? Cümə axşamı keçirilən brifinqdə Turan Agentliyinin bu sualına cavabda Dövlət Departamentinin mətbuat katibi Metyu Miller daha çox təfərrüat verməkdən yayınıb, ABŞ-ın təfərrüatları açıqlaya bilməyəcəyini bildirib.

"Düşünürəm ki, Rusiya hökuməti təbliğat və dezinformasiya ilə məşğuldur. Düşünürəm ki, onların bu terror hücumundan Ukraynaya qarşı təcavüzlərinə bəraət qazandırmaq üçün istifadə etməyə çalışdıqları tamamilə aydın idi", deyə Miller qeyd edib.