KXCP etiraz açıqlaması yayıb

Klassik Xalq Cəbhəsi partiyası çərşənbə axşamı (KXCP) açıqlama yayıb. 

Xəbərdə eks-prezident Əbülfəz Elçibəyin zəhərlənməsilə bağlı qaldırılmış cinayət işilə əlaqəli KXCP sədri Mirmahmud Mirəlioğlunun istintaqa verdiyi ifadə barədə yanlış xəbərlər yayılmasına etiraz ifadə edilir. Mənbə qeyd edir ki, bu xəbərlər partiya sədrinin hələ istintaqda ifadə verməsi başa çatmadan xəbər portallarında tirajlanıb. Yayılan xəbərlərdə KXCP sədrinin eks-prezidentin zəhərlənməsini təsdiq etdiyi qeyd edilirdi. 

“Tamamilə cəfəngiyatdır, əksinə, M.Mirəloğlu həm prokurorluqda, həm də ifadə verdikdən sonra ona müraciət edən bütün mətbuat orqanlarına birmənalı olaraq bildirib ki, Elçibəyin zəhərlənməsi absurd bir məsələdir, cinayət işinə xitam verilməlidir”, - deyə mənbə partiya sədrinin ifadəsindən sitat gətirir.  

Xəbərdə iqtidaryönlü media qurumlarının yaydığı bu məlumatı ad çəkilmədən müxalifətçi olduğunu bildirən bəzilərinin KXCP sədrinə qarşı aşağılama, təhqir cəhdi kimi istifadə etmək istəməsi qınanılır. “Dezinformasiyanı bayraq edərək müxalif həmkarlarınızın üzərinə hücum edirsinizsə, iqtidarla fərqiniz nədir? Müxalifətçilik beləmi olur?”, - deyə mənbə nəzərə çatdırır. -05D-