Laçın Məmişov Çeçen İçkeriya Respublikasının İsveçrədə nümayəndəsi təyin edilib

Bakı/20.08.22/Turan: İsveçrədə mühacirətdə yaşayan azərbaycanlı sənədli film rejissoru Laçın Məmişov Çeçen İçkeriya Respublikasının İsveçrədəki nümayəndəsi təyin edilib.

17 avqust 2022-ci il tarixli 045 saylı müvafiq sərəncamı Çeçen İçkeriya Respublikası mühacir hökuməti Nazirlər Kabinetinin sədri Əhməd Zakayev imzalayıb. 

“Və beləliklə bu gündən Çeçen İçkeriya Respublikasının diplomatik missiyasını  yerinə yetirəcəm.

Dostlar, bu gün Çeçen İçkeriya Respublikası hökuməti mənə böyük şərəf verdi, göstərilən etimada görə minnətdaram, amma eyni zamanda üzərimə böyük məsuliyyət qoyuldu. Nazirlər Kabinetinin sərəncamı ilə Çeçen İçkeriya Respublikası hökumətinin İsveçrədə nümayəndəsi təyin edildim. Çox şadam ki, Qafqazın azadlığı uğrunda şər imperiyasına qarşı müqavimətin ön cərgəsindəyəm və bütün azadlıqsevər insanların qəhrəmanları - Cövhər Dudayev, Zəlimxan Yandarbiyev, Aslan Məshadov, Abdul-Halim Sadullayev və Əhməd Zakayevin rəhbərlik etdiyi hökuməti təmsil edirəm.

Eyni zamanda çox xoşbəxtəm ki, Çeçen İçkeriya Respublikasının 42 000 12 yaşına qədər uşaq olmaqla ümumilikdə 300 000 dinc sakin  qətli ilə əlaqədar hərbi cinayətkarların məsuliyyətə cəlb olunması üzrə prosesin iştirakçısıyam. Buna tam əminəm ki, çox tezliklə hərbi cinayətkarlar Haaqa Beynəlxaq Cinayət Məhkəməsində müttəhimlər kürsüsündə oturacaqlar”, -
Laçın Məmişov öz Facebook səhifəsində yazıb.—0—