Lavrov və Məmmədyarovun iqtisadi və hərbi əməkdaşlıq barədə şərhləri

Bakı/03.12.19/Turan: "Dünən Azərbaycan prezidenti ilə çox məzmunlu görüş keçirdik. Görüşün yekunlarına görə çox əhəmiyyətli razılaşmalar əldə olunub", bu barədə Rusiya XİN başçısı Sergey Lavrov çərşənbə axşamı Bakıda Azərbaycan XİN başçısı Elmar Məmmədyarovla birgə mətbuat konfransında bildirib.

"Beynəlxalq gündəlik haqqında, habelə beynəlxalq təşkilatlar çərçivəsində əməkdaşlıq haqqında danışdıq. Həmçinin, Xəzərdə əməkdaşlığı, əməkdaşlığın gücləndirilməsi üçün səylərin əlaqələndirilməsini müzakirə etdik. İqtisadiyyatla bağlı ilin yekunlarına görə 15%-ə yaxın artım gözlənilir. Humanitar əməkdaşlığa gəlincə, burada da artım müşahidə olunur", deyə o bildirib.

Daha sonra o, tərəflərin hərbi-texniki əməkdaşlığının əhəmiyyətini qeyd edib. "Yalnız onu qeyd edə bilərəm ki, hərbi-texniki əməkdaşlıq Moskva və Bakı arasında strateji tərəfdaşlığın mühüm sahələrindən biridir. Hərbi-texniki əməkdaşlığı beynəlxalq qanunvericiliyə tamamilə uyğun şəkildə inkişaf etdiririk", deyə o bildirib.

Məmmədyarov öz növbəsində əlavə edib ki, bu sahədə əməkdaşlıq həmişə gündəlikdə olub. "Müəyyən ideyalar var. Sövdələşmə olan kimi KİV-ə məlumat verəcəyik", deyə o bildirib.

Azərbaycan XİN başçısı da deyib ki, danışıqların yekunlarına görə Azərbaycan və Rusiya XİN-ləri arasında protokol imzalanıb.

"İqtisadiyyatda ciddi artım var, ticarət dövriyyəsi artır, ilin sonuna qədər 3 mlrd. dollara çata bilər. Azərbaycan Cənubi Qafqazda Rusiyanın əsas ticarət tərəfdaşıdır", deyə Məmmədyarov bildirib. -02D-