London qəzeti Azərbaycan hakimiyyətinin Britaniya deputatlarını necə ələ alması haqqında

Bu təşkilat Londonun eksklüziv Meyfer bölgəsində yerləşir və bütün partiyalardan olan siyasətçilər üçün qonaqpərvər naharlar təşkil edir. Bu barədə The Observer yazır. Guya müstəqil ticarət təşkilatı olan “European Azerbaijan Society (Teas)” müntəzəm olaraq İcmalar Palatasının və Avropa Parlamentinin üzvlərini, habelə məmurları keçmiş sovet respublikasına səfərlərə göndərir, burada onlar təmtəraqlı otellərdə qəbul edilir”, bu barədə jurnalistlər Ceymi Douord və Şarlotta Letimer yazır.

Nəşr adı çəkilməyən “insayderin” danışdıqlarını yazır: “Əsl istirahət, çox sayda dəyərli hədiyyələr. Əsasən bahalı ipək xalçalar, qızıl və gümüş məmulatlar, alkoqol, qara kürü və pul hədiyyə edirlər. Bakıda iki kiloqram kürü adi hədiyyədir”.

“Hüquq müdafiəçilərinin bu cəmiyyətin seçkilərin nəticələrinin saxtalaşdırılmasında və müstəqil jurnalistlərə və müxalifət partiyalarına qarşı amansız davranmaqda ittiham olunan dünyanın ən avtokrat ölkələrindən birinin imicini yaxşılaşdırmaq üçün “qara kürü diplomatiyasndan” istifadəsi ilə bağlı sualları yaranır”, deyə məqalədə qeyd edilir. 

Cəmiyyəti “neft və dağ-mədən sahələrində böyük payları olan Azərbaycan elitası ailələrinin carçısı” adlandırırlar (qəzetin ifadəsi). Nəşrin məlumatına görə, cəmiyyətin sədri Taleh Heydərovdur.

Qəzet bunu “Prezident İlham Əliyevin yaxın əhatəsinə daxil olan və çox vaxt Azərbaycanda ən qüdrətli şəxs adlandırılan fövqəladə hallar naziri Kəmaləddin Heydərovun Londonda yaşayan oğlu” kimi səciyyələndirir.

Müəlliflər yazırlar ki, cəmiyyətin “Vestminsterlə sıx əlaqələri var” (Britaniya parlamenti – red. qeydi). “O, Azərbaycan işləri üzrə bütün partiyaların parlament qrupuna katiblik dəstəyi göstərir və partiyaların illik konfranslarında deputatlar üçün geniş qəbullar təşkil edərək, bütün siyasi düşərgələrin siyasətçiləri ilə münasibətləri cidd-cəhdlə inkişaf etdirir”, deyə məqalədə yazılır.

Sənədlərə əsasən, cəmiyyət mühafizəkar deputatların ölkəyə səfərlərinə ən az 71740 funt, leyborist deputatların səfərlərinə isə ən az 9700 funt xərcləyib.

Cəmiyyətin Britaniya biznesmenlər dairələrində nüfuzu var, deyə qəzet iddia edir. “Ötən ay o, böyük ticarət konfransı təşkil edib, burada Britaniyanın Azərbaycanın həyatında iştirakı təbliğ edilib”, deyə məqalədə qeyd edilir.

Tənqidçilər belə bir sual verir: bəlkə Böyük Britaniya Azərbaycanda qaz yataqlarından daha çox insan hüquqlarının pozulmasına diqqət yetirməlidir? Human Rights Watch sentyabrda bəyan edib ki: “Azərbaycan hökuməti fərqli düşüncənin məhdudlaşdırılması üçün məqsədyönlü, amansız strategiya tətbiq edir”.

Amma prezident seçkilərində müşahidəçi olan Britaniya deputatları etiraz edirlər, deyə müəlliflər yazır. Belə ki, deputat Mayk Henkok bildirib ki, hətta kiçik nöqsanlar belə görməyib. Qəzet iddia edir ki, “Henkokun köməkçisi və sevgilisi vaxtilə cəmiyyət üçün işə görə 3 min funt alıb”. Henkok deyib ki, müşahidəçilər missiyası onun qiymətləndirmələri ilə razılaşır, onun köməkçisinin işi haqqında isə parlamentdə rəsmi məlumat verilib və bütün qaydalara uyğun olub”. -0-