Mahir Abdullayevin taleyinə hələ ki, aydınlıq gətirilmir

MTN zabiti Mahir Abdullayevin hüquqlarını Müdafiə Komitəsi zabitin itkin düşməsilə bağlı yeni video-sənəd yayıb.

Video-sənəddə keçmiş rektor Elşad Abdullayev və qardaşı Eldəniz Abdullayevin MTN zabiti İlqar Abbasovla söhbəti əksini tapıb.

MTN zabiti İ.Abbasov Elşad və Eldəniz Abdullayev qardaşlarına bildirir ki,  M.Abdullayevlə MTN-in klinikasında görüşüb. Daxili İşlər Nazirliyinin M.Abdullayevi Müsavat Partiyası ilə əlaqəsi olmasına görə həbs etməsi iddiasını səsləndirir. İ.Abbasov M.Abdullayevin kitabını MTN-in muzeyinə apardığına görə töhmət aldığını da nəzərə çatdırır. Onun dediklərinə görə, nazir Eldar Mahmudov da M.Abdullayevin azad olunmasını istəyir, amma öncə M.Abdullayevin günahsızlığı sübuta yetirilməlidir. 

Daha sonra İ.Abbasov M.Abduıllayevin səhhətinin yaxşı olduğunu, klinikada rəsmi qeydiyyata alındığını nəzərə çatdırır. Ancaq M.Abdullayevin öz adı və soyadı ilə yox, Isgəndər İsfəndiyar oğlu Əhmədov kimi qeydiyyata alındığını qeyd edir. 

Keçmiş rektor E.Abdullayev qardaşı M.Abdullayevin taleyilə bağlı daha bir açıqlamanı şahid Məmmədli Əliyevin dediklərinə istinadən yayıb. M.Əliyev M.Abdullayevlə 2003-cü il oktyabrın 13-də görüşməliymiş. M.Abdullayev həmin gün səhər müğənni Mətanət İsgəndərlinin  evinə gəlir və oradan çıxmır. 

Bundan sonra şahid ifadəsində M.Əliyev hadisəni olduğu kimi istintaqa bildirir. İstintaqa həqiqəti yazdığına görə müğənni Mətanət İsgəndərlinin, nazir müavini Hilal Əsədovun və digərlərinin  hədə-qorxularına məruz qalıb. MTN generalı Akif Çovdarovun hədə- qorxusundan sonra isə M.Əliyev müğənni M.İsgəndərlinin əleyhinə ifadəsini geri götürməyə məcbur olub. Təzyiqlər o qədər güclü olub ki, M.Əliyev təhlükəsizliyinin təmin olunması üçün dövlət başçısı İlham Əliyevə və nazir Eldar Mahmudova müraciət ünvanlamalı olub.  

M.Əliyevin söylədikləri M.Abdullayevin oğurlanmasından PA rəhbəri Ramiz Mehdiyevin, MTN-in nazir müavinləri Əli Nağıyev və Nilal Əsədovun da xəbəri olduğunu təsdiqləyir. M.Əliyev iddia edir ki, R.Mehdiyev bu adam oğurluğu ilə bağlı nazir müavini H.Əsədovu möhkəm danlayıb. Üstəlik, M.Əliyev iddia edir ki, Xınalıq kəndindəki dağa yaxın yerdə H.Əsədova məxsus restoran var. Həmin restorana gələn pullu adamları qız-qadınla şantaj edərək külli miqdarda pul tələb edirlərmiş.

MTN zabiti M.Abdullayev 2003-cü il oktyabrın 13-də itkin düşüb. M.Abdullayevin göstərilən tarixdə müğənni Mətanət İsgəndərlinin evinə gəlib və bundan sonra taleyi barədə hər hansı dürüst informasiya olmayıb. Bu məsələ uzun müddət diqqəti cəlb etməyib. 2012-ci ilin yayında “deputat mandatı alveri” videomaterialı yayıldıqdan sonra bu məsələ aktuallaşıb. -05D-