Makron: Fransa Dağlıq Qarabağda nizamlanmaya yardım edəcək

Bakı/20.07.18/Turan: Fransa Dağlıq Qarabağ münaqişəsinin region xalqlarının maraqlarına uyğun şəkildə nizamlanmasına yardım etməyə davam edəcək. Bu barədə, TASS-ın verdiyi məlumata görə, Fransa prezidenti Emmanuel Makronun Azərbaycanlı həmkarı İlham Əliyevlə Parisdə keçirilən görüşünün yekunlarına görə Yelisey Sarayının cümə günü yaydığı kommünikedə deyilir.

"İki ölkə prezidenti Dağlıq Qarabağ münaqişəsi ilə bağlı fikir mübadiləsi aparıblar. Fansa ATƏT-in Minsk Qrupunun həmsədri kimi regionda uzunmüddətli sülhün təmin edilməsinə görə məsuliyyət daşıyır", deyə Fransa Respublikası prezident administrasiyasının bəyanatında qeyd edilir.

"Fransa prezidenti qeyd edir ki, o, uzunmüddətli əsaslarla və bütün region xalqlarının maraqları daxilində bu münaqişəyə son qoymaq üçün yeganə variant olan danışıqlar əsasında həll axtarışını davam etdirəcək", deyə kommünikedə bildirilir.

Sənəddə həmçinin qeyd edilir ki, Makron "Ermənistan və Azərbaycan XİN başçılarının iyulun 11-də Brüsseldə keçirilən görüşünü alqışlayıb". "Fransa prezidenti vəziyyəti diqqətlə izləyir və Fransa Rusiyalı və Amerikalı həmsədrlərlə birlikdə nizamlanma prosesində irəliləyişə nail olmaq üçün əlindən gələn təşəbbüsü göstərəcək", deyə Yelisey sarayının məlumatında qeyd edilir. -0-