Makron Fransanı Ermənistan-Azərbaycan münaqişəsində vasitəçi rolundan məhrum edə bilər

Bakı/14.10.22/Turan: Fransa prezidenti Emmanuel Makronun oktyabrın 12-də televiziyaya müsahibəsində Azərbaycana qarşı yönələn tamamilə birtərəfli və açıq şəkildə Ermənistanı müdafiə edən fikirləri qəbuledilməzdir. Bu barədə XİN-in Makronun France 2 telekanalına müsahibəsi ilə bağlı şərhində deyilir. 

Makronun sözlərinə görə, iki il əvvəl Azərbaycan "çoxsaylı qurbanlara, amansızlıqlara və işğala gətirib çıxaran dəhşətli müharibəyə başlayıb". O, həmçinin bu yaxınlarda Ermənistanla sərhəddə baş verən hərbi gərginlikdə Azərbaycanı ittiham edib.

Şərhdə qeyd edilir ki, Fransa prezidentinin fikirləri Azərbaycana qarşı yönəlib və açıq şəkildə Ermənistanı müdafiə edir.

Azərbaycan XİN Fransanın dövlət başçısının "əsassız ittihamlarını" rədd edir.

"Fransa Prezidenti məhz o dövlət başçısıdır ki, Ermənisanın Azərbaycan ərazilərini 30 ilə yaxın işğal atında saxlaması, bu torpaqlardakı qanunsuz fəaliyyəti, beynəlxalq hüququn fundamental prinsiplərini heçə sayaraq Azərbaycanın ərazi bütövlüyünü və yüz minlərlə azərbaycanlının hüquqlarını kobud şəkildə pozması, BMT TŞ-nin qətnamələrini yerinə yetirməməsi barədə, ölkəsi Minsk Qrupunun həmsədri omasına rəğmən bir kəlmə də olsun söz deməyib", deyə XİN-in şərhində bildirilir.

Azərbaycan öz növbəsində, hazırda Minsk Qrupunun fəaliyyət göstərməsinin qeyri-mümkünlüyünü nəzərə alaraq, Fransa prezidentinin iki ölkə arasında münasibətlərin normallaşması prosesində vasitəçilik təşəbbüslərinə "yox" deməyib.

Bu günədək Makronun vasitəçiliyi ilə 4 fevral 2022 və 6 oktyabr 2022-ci il tarixlərində dördtərəfli görüşlər baş tutub. Ancaq Fransa Prezidentinin Azərbaycana qarşı səsləndirdiyi fikirlər onun vasitəçilik səylərinin "neytrallığını və qərəzsizliyini" ciddi sual altında alır.

"Azərbaycanın bölgədə sülh, sabitlik və inkişafı təmin etmək, beynəlxalq hüquq prinsiplərinə hörmət əsasında münasibətləri normallaşdırmaq cəhdləri qarşılığında Fransanın birtərəfli mövqeyi və əsassız ittihamları bu ölkənin vasitəçlik səylərinin bir daha nəzərdən keçirilməsini labüd edir", deyə XİN-in şərhində qeyd edilir. 06B