Maliyyə Nazirliyi “Sovetski” sakinlərinə cavab verib

Bakı/20.04.21/Turan: “Keçmiş “Sovetski” adlanan ərazinin sakinləri olmuş vətəndaşlarımızı ictimai qaydanın və aşayişin pozulması ilə müşaiyət olunan destruktiv fəaliyyətdən, bir qrup şəxslərin təhriki ilə əlavə vəsait tələb etməkdən çəkinməyə çağırır və iddia tələbləri ilə bağlı müvafiq məhkəmələrə müraciət etmələrini tövsiyə edirik”. Bu barədə Maliyyə Nazirliyinin Bakı şəhəri Yasamal rayonunun keçmiş “Sovetski” adlanan ərazisində vaxtilə yaşamış bir qrup sakinin səsləndirldiyi iddialara münasibətində bildirilir.

Bakının “Sovetski” adlanan ərazisində sakinlərin yaşadıqları evlər 2014-cü ildən başlayaraq sökülüb. Sakinlərin bir qismi kompensasiyanın az olduğunu, yeni mənzil ala bilmədiklərini bildirir. Onlarla sakin aprelin 19-da Nazirlər Kabinetinin binası qarşısında etiraz aksiyası keçirib Maliyyə Nazirliyini onları aldatmaqda ittiham edib.

Nazirlik bildirir ki, keçmiş “Sovetski” adlanan ərazidə vaxtilə könüllü razılıq əsasında köçmüş, indi isə tərəflərin razılığı ilə bağlanmış alqı-satqı müqavilələri əsasında satın alınan evlərinə görə onlara edilən ödənişlərin guya natamam hesablanması, evlərin düzgün ölçülməməsi, kompensasiya məbləğinin azaldılması, habelə həmin ərazidə torpaq sahələri üzrə mülkiyyət hüquqlarının pozulmasına dair bir qrup keçmiş sakinin səsləndirdikləri iddiaların heç bir əsası yoxdur.

“Vəsaitlərini götürən bütün sakinlərə evlərindən yeni mənzillərinə köçmək üçün ən azı bir ay müddət və əlavə olaraq hər bir ailəyə 1000 manat məbləğində köçmək üçün vəsait ödənilib. Bundan başqa, köçürülmə zamanı torpaq sahələrinin onların xüsusi mülkiyyətində olmasına dair müvafiq sənədlər təqdim edən sakinlərə əlavə kompensasiya hesablanaraq ödənilib”.

Maliyyə Nazirliyi yaranmış mübahisələrlə bağlı sakinlərin məhkəmələrə müraciət etməsini tövsiyə edib. -0-