Mədəniyyətlərarası dialoq üzrə II Beynəlxalq Forum

Bu gün Bakıda “Çoxmədəniyyətli dünyada sülh şəraitində birgə yaşama” mövzusunda II Beynəlxalq  Forum açılıb. Forumda 100-dən çox ölkənin və beynəlxalq təşkilatların nümayəndələri iştirak edirlər.

Azərbaycan prezidenti İlham Əliyev görüşü açaraq qeyd edib ki, indiki forum 2008-ci ildə başlamış Bakı prosesinin davamıdır.

“Coğrafi körpü olan Bakı eyni zamanda mədəniyyətlər arasında körpü rolunu oynayır”, - İ.Əliyev vurğulayıb.

Azərbaycan burada yaşayan müxtəlif etiqadlı xalqların tarixi vətəni olub və onların sülh şəraitində birgə yaşaması tolerantlığa nümunə ola bilər.

Bununla yanaşı müasir dünyada etnik və dini dözümsüzlük zəminində münaqişələr baş verir. Yalnız mədəniyyətlərarası dialoqun inkişafı ilə münaqişələrin aradan qaldırılmasına  nail olmaq olar.

Dövlət başçısı bildirib ki, bu dünyada hər xalq, hər millət üçün yer var. Yetər ki sülh və əməkdaşlıq olsun. “Bizim beynəlxalq münasibətlərdəki addımlarımız əməkdaşlığa yönəlib”, -o qeyd edib.

O həmçinin çoxmədəniyyətlilik məsələsinə toxunub. Dövlət başçısı deyib ki, çoxmədəniyyətlilik böhranı barədə fikirlər mədəniyyətlər və sivilizasiyalar arasında dialoqa xidmət etmir. 

BMT Sivilizasiyalararası Alyansının katibi Nasir Əbdüləziz əl-Nasir BMT baş katibi Pan Gi Munun forum iştirakçılarına müraciətini çatdırıb.

Forumda YUNESKO və İSESKO-nun baş katibləri İrina Bokova və Əbdüləziz Osman əl-Tuveycri çıxış ediblər.

Forum çərçivəsində həmin təşkilatlarda və digər beynəlxalq strukturlarda tədbirlər keçiriləcək. Forum iyunun 1-də başa çatacaq.—03B06-