Məhkəmə “Abzas Media” rəhbərlərini girov müqabilində azad etməkdən imtina edib

Cümə axşamı Bakının Xətai Rayon Məhkəməsi “Abzas Media” onlayn nəşrinin direktoru və baş redaktoru Ülvi Həsənli və Sevinc Vaqifqızının pul girovu müqabilində azadlığa buraxılması ilə bağlı müdafiə tərəfinin vəsatətlərini təmin etməyib.

Vəkil Elçin Sadıqov Turan-a bildirib ki, bu qərarlardan apellyasiya şikayəti veriləcək.

Vəkil qeyd edib ki, iyunun 20-də onların həbs müddəti başa çatır. Lakin iqtisadçı Fərid Mehralızadə “Abzas Media” işi üzrə  cəlb edildikdən və 3 ay 20 gün müddətinə həbs edildikdən sonra Həsənli və Vaqifqızının həbs müddəti də sentyabrın 20-dək uzadıla bilər.

* Noyabr 2023– cü il - yanvar 2024-cü ildə “Abzas Media” ilə əlaqəli altı jurnalist və media işçisi "qabaqcadan əlbir olan bir qrup şəxs tərəfindən xarici valyuta qaçaqmalçılığı" ittihamı ilə həbs edilib.

Apreldə meclis.info saytının rəhbəri İmran Əliyev və Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli bu iş üzrə həbs ediliblər. Sonradan onların işi ayrıca icraata götürülüb.

İyunun 1-də iqtisadçı Fərid Mehralızadə  “Abzas Media” işi üzrə  həbs edilib.

Həbs olunanlar özlərini günahkar hesab etmirlər. Hüquq müdafiəçiləri onları siyasi məhbuslar kimi tanıyıblar. Beynəlxalq təşkilatlar həbs olunanların azad edilməsinə çağırıblar.