Məhkəmə Fazil Qasımovu həbsdən azad etməyib

Dekabrın 26-da Bakı Ağır Cinayətlər Məhkəməsində iqtisadçı Fazil Qasımovun işi üzrə proses davam edib.

Onun vəkili Fuad Ağayev qətimkan tədbirinin dəyişdirilməsi və Qasımovun həbsdən azad edilməsi barədə vəsatət qaldırıb. Çünki o  1 il 4 aydır ki, heç bir maddi və prosessual əsas olmadan həbsdədir. Lakin vəsatət təmin edilməyib.

Sonra digər müttəhim Anar Əliyevin ifadələri dinlənilib. O, saxta puldan istifadə etməklə bağlı  günahını etiraf etməyib, lakin silah saxladığını etiraf edib

Anar Əliyev bildirib ki, guya 2023-cü ilin yayında iqtisadçı Qubad İbadoğlundan xahiş edib ki, onu işə düzəltsin. Əliyevin sözlərinə görə, İbadoğlu ona bildirib ki, payızda şirkət yaradacaq və onu işə götürəcək. Guya İbadoğlu Əliyevə 11 min dollar verib ki, o,  "Qafqaz" Universitetinin məzunlarını gələcəkdə yaradılacaq şirkətdə işə götürsün.

Əliyevin dediklərinə görə, sonradan məlum olub ki, 1000 dollar saxta imiş, bundan onun da xəbəri olmayıb.

Əliyev deyib ki, İbadoğlu onu hansısa Fazil ilə bir araya gətirib və onunla videobağlantı ilə ünsiyyətdə olub. Lakin müttəhim Fazil Qasımov o adam deyil, Əliyev bildirib.

Bundan əvvəl İbadoğlu özü bildirib ki, Əliyevlə tanış deyil. İbadoğlunun sözlərinə görə, ötən ilin yayında "Təzə Pir" məscidinin yanındakı parkinqdə bir nəfər ona yaxınlaşaraq həyatdan, iqtisadi çətinliklərdən şikayət edib. Həmin adam istintaqın müttəhim kimi təqdim etdiyi Əliyevə bənzəyib.

Məhkəmə yanvarın 9-da davam edəcək.

*Fazil Qasımov 8 avqust 2023-cü ildə İstanbulda saxlanılıb və Azərbaycana gətirilib. O,  tanınmış iqtisadçı və Azərbaycan hökumətinin tənqidçisi Qubad İbadoğlu ilə birlikdə saxta pul hazırlamaqda ittiham olunub. Lakin hazırda Fazil Qasımovun cinayət işinə İbadoğlunun cinayət işindən ayrı baxılır.

Cinayət Məcəlləsinin 204.3.1-ci (mütəşəkkil qrupun tərkibində saxta pulların hazırlanması, alınması və ya satışı) maddəsilə ittiham olunub.

O, qanunsuz həbsinə etiraz edərək iyunda aclıq elan edib. Son vaxtlar əvvəkitək yeməkdən imtina edir, ancaq bal ilə şirinləşdirilmiş qatıq və su qəbul edir.