Məhkəmə fəalı 3 il azadlıqdan məhrumetmə cəzasına məhkum edib

Bakı Ağır Cinayətlər Məhkəməsində Kamran Muxtarovun sədrliyi ilə narkotik vasitələrin qanunsuz dövriyyəsində ittiham olunan ictimai fəal Zəka Mirağayevin işi üzrə proses başa çatıb.

Müttəhim son sözündə bir daha ona qarşı irəli sürülən ittihamı rədd edib, bu barədə vəkil Elçin Sadıqov bildirib.

Fəal deyib ki, saxlanıldıqdan sonra polis bölməsində işgəncəyə məruz qalıb və fiziki təzyiq altında öz-özünə böhtan atıb. Mirağayevin sözlərinə görə, narkotiki onun cibinə polis qoyub.

Mirağayev həmçinin deyib ki, məhkəmə obyektiv istintaq aparmayıb və hətta Bakının Səbail Rayon Polis İdarəsinin 9-cu polis bölməsinin onun orada olduğu vaxta aid videokamera görüntülərini istəməyib. Bu görüntülər izlənilsəydi, polis bölməsində onun başına gələnlər aydın olardı.

Mirağayev qeyd edib ki, polid orqanlarının qanunsuz hərəkətlərini tənqid etdiyinə görə təqib olunur.

Prokuror Mirağayevin 7,5 il müddətinə azadlıqdan məhrum edilməsini istəmişdi.

Müdafiə tərəfi fəala bəraət verilməsini istəyib.

Təhqiqatın nəticəsinə görə məhkəmə ittihamı Azərbaycan Respublikası CM-in 234.4.3-cü (narkotik vasitələrin satış məqsədilə qanunsuz dövriyyəsi, külli miqdarda törədildikdə) maddəsindən 234.1-1-ci (satış məqsədi olmadan qanunsuz olaraq narkotik vasitələri və ya psixotrop maddələri xeyli miqdarda əldə etmə, saxlama, hazırlama, emal etmə, daşıma) maddəsinə tövsif edib və Mirağayevi 3 il azadlıqdan məhrumetmə cəzasına məhkum edib.

Müdafiə tərəfi hökmdən şikayət vermək niyyətindədir.

Xatırladaq ki, Mirağayev 11 oktyabr 2023-cü il tarixində saxlanılıb. Səbail Rayon Məhkəməsi onu 4 ay müddətinə həbs edib və o vaxtdan etibarən həbs müddəti dəfələrlə uzadılıb.

Mirağayev özünü təqsirli bilməyib. O, məhkəmədə bildirib ki, evdən aparılıb və narkotiki cibinə polis əməkdaşları qoyub.

Mirağayevin yaxınları fəalın həbsini onun DİN rəhbərliyini tənqid etdiyi açıq məktubu ilə əlaqələndirirlər.