Məhkəmə İntiqam Əliyevi 3 ay müddətinə həbs etdi (YENİLƏNİB)

Nəsimi Rayon Məhkəməsi Hüquq Maarifçiliyi Cəmiyyətinin rəhbəri İntiqam Əliyev barəsində qərar çıxarıb.

Vəkil Anar Qasımlı  Turan-a bildirib ki, İ.Əliyev Cinayət Məcəlləsinin 213.1-ci (vergidən yayınma), 308.2-ci (vəzifə səlahiyyətlərindən sui-istifadə etmə) və 192.2-ci (qanunsuz sahibkarlıq) maddələri ilə təqsirləndirilən şəxs qismində cəlb edilməklə barəsində 3 ay müddətinə həbs qətimkan tədbiri seçilib.

Onun sözlərinə görə, İntiqam Əliyev həbsinin arxasında siyasi motiv dayanır.

“Hüquq müdafiəçi Avropa Məhkəməsinə şikayətlər göndərdiyinə və korrupsiya faktlarını aşkarladığına görə həbs edildiyini düşünür”, deyə vəkil bildirib.

2014 Avqust 08 (Cümə) 17:30:14

Hüquq müdafiəçisi İntiqam Əliyevin Saray qəsəbəsindəki evində saat 12.30-da başlamış axtarış saat 16.45-də başa çatıb.

Vəkil Anar Qasımlının verdiyi məlumata görə, axtarış zamanı flash-kartlar, kompüter, üç suvenir xəncər müsadirə edilib.

Axtarış zamanı həm istintaq tərəfindən cəlb edilmiş, həm də müdafiə tərəfdən dəvət edilmiş hal şahidləri iştirak edib.

Əliyevin rəhbərli etdiyi Hüquqi Maarifləndirmə Cəmiyyətinin ofisində də axtarış aparılır.

Axtarışın yekunlaşmasını gözləmədən, Əliyevin özünü qətimkan tədbiri seçmək üçün Nəsimi rayon məhkəməsinə aparıblar.

Əliyevin nədə ittiham olunduğu hələlik aydın deyil. Bəzi məlumatlara görə, bir müddət əvvəl həbs edilmiş hüquq müdafiəçiləri kimi, ona qarşı da vergi ödənişindən yayınmaq, qanunsuz sahibkarlıq və s. maddələrlə ittiham irəli sürülüb. -16/06D-

2014 Avqust 08 (Cümə) 12:36:21

“Hüquq Maarifçiliyi” Cəmiyyətinin sədri, tanınmış hüquqşünas İntiqam Əliyev avqustun 8-də Baş Prokurorluğun Ağır Cinayətlərə dair İşlər üzrə İstintaq İdarəsində dindirilir, səhər saatlarından onun evində axtarış aparılır. Bu barədə Turana  İntiqam Əliyevin qızı Nərmin Əliyeva bildirib.

Xatırladaq ki, bir neçə gün öncədən prokurorluq, vergi və ədliyyə əməkdaşları “Hüquq Maarifçiliyi” Cəmiyyətində yoxlama aparırdı. Məhkəmə cəmiyyətin bank hesabına həbs qoyub.

Bu ilin mayında Azərbaycanın bir sıra qeyri-hökumət təşkilatları və xarici qeyri-hökumət təşkilatlarının filial və nümayəndəliklərinin fəaliyyətlərində aşkar edilmiş qanun pozuntuları faktlarına dair Ədliyyə Nazirliyindən Baş Prokurorluğa daxil olmuş materiallar üzrə Cinayət Məcəlləsinin 308.1 (vəzifə səlahiyyətlərindən sui-istifadə və 313-cü (vəzifə saxtakarlığı) maddələri ilə cinayət işi başlanıb.

Qeyri-rəsmi mənbələrə görə, artıq 12 QHT və 13 fiziki şəxsin bank hesabına həbs qoyulub. 3 tanınmış hüquq müdafiə fəalı həbs edilib. 

Son məlumata görə  Əliyev “Hüquq Maarifçiliyi” Cəmiyyətinin axtarış aparlıması üçün gətirilib.

Əliyey jurnalistlərə deyib ki, ona qarşı ittiham irəli sürülüb. İndii Azərbaycanda   insan hüquqları ilə məşğul olan, korrupsiya ilə mübarizə aparan,  seçki saxtakarlıqlarını ifşa edən insanları həbs edirlər,   deyə daha sonra o əlavə edib.

Bundan sonra danışmağı ona imkan verməyiblər. –03D--