Məhkəmə Qubad İbadoğlunun mənzilində axtarışın qanunsuz olduğunu etiraf etməkdən imtina edib

Bakı/11.08.23/Turan: Bu gün Nərimanov Rayon Məhkəməsində müxalifətyönlü siyasətçi və iqtisadçı alim Qubad İbadoğlunun Bakının Nərimanov rayonunda qeydiyyatda olduğu mənzildə axtarış aparılmasının qanunsuz olması barədə şikayətinə baxılıb.

Axtarış iyulun 23-də onun saxlanıldığı gün aparılıb və müdafiə tərəfinin bildirdiyinə görə, bu barədə məhkəmə qərarı olmayıb, odur ki, bu istintaq tədbiri qanunsuz olub.

Şikayəti vəkil Zibeyda Sadıqova verib.

Vəkil bildirib ki, məhkəmədə İbadoğlu bildirib ki, bu mənzildə yaşamayıb, uzun müddət ABŞ və Avropada elmi-pedaqoji fəaliyyətlə məşğul olub.

Bu mənzildə, ümumiyyətlə,  heç kim yaşamayıb. Ona görə də mənzildə “aşkar edilmiş”  “saxta” və ya “həqiqi” dollarların ona heç bir aidiyyatı yoxdur.

Lakin məhkəmə şikayəti təmin etməyib, müdafiə tərəfi apellyasiya şikayəti verəcək.

Müdafiə tərəfi hesab edir ki, axtarışın qanunsuz olmasının tanınması istintaqı "sübut bazasından" məhrum edəcəkdi və bununla əlaqədar İbadoğlu azad edilməliydi.

Bundan öncə bildirildiyi kimi, İbadoğlunun qeydiyyatda olduğu mənzildə axtarış zamanı 40 min dollar aşkar edilərək götürülüb.

*İyunda İbadoğlu Milli Şuranın rəhbəri, professor Cəmil Həsənli və Avropada siyasi mühacirətdə olan diplomat Arif Məmmədovla birlikdə Azərbaycan gənclərinin təhsil fondunun yaradıldığını bildirib. Fond Londonda qeydiyyatdan keçib.

Qubad İbadoğlu xaricdəki azərbaycanlı məmurların əmlakının müsadirə edilməsi və həmin vəsaitlərin bu fonda köçürülməsi təşəbbüsü ilə çıxış edib. 06В