Mehriban Əliyevanın Fransaya səfəri

Bakı/12.03.19/Turan: Martın 12-də Parisdə Azərbaycanın birinci vitse-prezidenti Mehriban Əliyevanın Fransanın baş naziri Eduard Filip ilə görüşündə Azərbaycan və Fransa arasında əlaqələrin inkişafı perspektivləri müzakirə olunub.

Söhbət zamanı E.Filip siyasi, iqtisadi və digər sahələrdə əlaqələrin uğurla inkişaf etdiyini bildirib və əməkdaşlıq üçün yaxşı perspektivlərin olduğunu deyib.

O, Fransa şirkətlərinin Azərbaycanın neft və qeyri-neft sektorunda çalışdıqlarını deyib, bu şirkətlərin Azərbaycan bazarında daha fəal olmasının önəmini vurğulayıb.

Öz növbəsində M.Əliyeva əmin olduğunu bildirib ki, səfər ikitərəfli əməkdaşlığın inkişafına mühüm töhfə verəcək.

İqtisadi sahədə əməkdaşlıq üçün böyük potensialın olduğunu deyən M.Əliyeva Azərbaycanda Fransanın 59 şirkətinin fəaliyyət göstərdiyini diqqətə çatdırıb və bu şirkətləri ölkəmizdə daha fəal olmağa çağırıb.

O, bu il hökumətlərarası komissiyanın toplantısının keçirilməsinin önəmini vurğulayıb.

Humanitar, mədəniyyət, elm sahələrində əməkdaşlıqdan danışarkən M.Əliyeva bildirib ki, Azərbaycanda fransız dilinə və ədəbiyyatına böyük maraq var, ölkəmizin 300-dən çox məktəbində fransız dili tədris olunur. Bundan əlavə, Azərbaycan Dillər Universitetində fransız dili və ədəbiyyatı mərkəzi, Bakı Slavyan Universitetində fransız dili mərkəzi, Bakı Fransız Liseyi və Fransız-Azərbaycan Universiteti uğurla fəaliyyət göstərir.

Dağlıq Qarabağ münaqişəsinə toxunan M.Əliyeva bildirib ki, hazırkı status-kvo qəbuledilməzdir. Münaqişənin tənzimlənməsi ilə bağlı BMT Təhlükəsizlik Şurasının 4 qətnaməsi var və münaqişə bu qətnamələr əsasında, beynəlxalq hüququn normaları, Azərbaycanın suverenliyi və ərazi bütövlüyü çərçivəsində öz həllini tapmalıdır.

Baş nazir E.Filip Fransanın sülh danışıqlarına sadiq qaldığını və münaqişənin beynəlxalq hüquq çərçivəsində həllinə tərəfdar olduğunu bildirib.

Görüşdən sonra Azərbaycan-Fransa sənədlərinin imzalanması mərasimi keçirilib.

Şimal-Cənub nəqliyyat dəhlizinin Sumqayıt-Yalama dəmir yolu xəttinin yenidən qurulmasına dair konvensiyanı Azərbaycanın maliyyə naziri Samir Şərifov və Fransanın Avropa və Xarici İşlər Nazirliyinin dövlət katibi Jan-Batist Lemuan imzalayıblar.

Azərbaycan Mərkəzi Bankı ilə "Rotchild & Cie" Bankı arasında strateji əməkdaşlıq sazişini Mərkəzi Bankın sədri Elman Rüstəmov və "Rotchild & Cie" Bankının baş direktoru Aryel Malard dö Rotşild imzalayıblar.

Əməliyyat Nəzarəti Mərkəzinin yaradılmasına dair araşdırma müqaviləsini və "Xocasən" deposunun siqnalizasiya və telekommunikasiya sisteminin reallaşdırılmasına dair müqaviləni "Bakı Metropoliteni" Qapalı Səhmdar Cəmiyyətinin sədri Zaur Hüseynov və "Thales International" şirkətinin baş direktoru Rafael Eskinazi imzalayıblar.

M.Əliyeva səfər çərçivəsində "Rothschild Global Financial Advisory" şirkətinin rəhbəri David dö Rotşild, "Suez Groupe" şirkətinin beynəlxalq inkişaf üzrə icraçı vitse-prezidenti Erik Qebali və Milli Xərçəng İnstitutunun təsisçisi və keçmiş prezidenti professor David Hayat ilə görüşüb.-06D--