Mərkəzi Seçki Komissiyası seçkiqabağı təşviqat üçün yerlərin siyahısını açıqlayıb

Azərbaycan Mərkəzi Seçki Komissiyası sentyabrın 1-də parlament seçkilərində deputatlığa namizədlərin seçkiqabağı təşviqatı üçün ayrılmış yerlərin siyahısını açıqlayıb.

Mərkəzi Seçki Komissiyasının məlumatında deyilir ki, 125 seçki dairəsində namizədlərin seçicilərlə görüşləri üçün 5113 yer ayrılıb. Onlardan 3259-u açıq məkanlarda, 1854-ü isə qapalı məkanlarda yerləşir.

Seçki Məcəlləsinə əsasən, namizədləri 60-dan çox dairədə qeydiyyatdan keçmiş siyasi partiyalar dövlət büdcəsindən maliyyələşdirilən mediada pulsuz efir vaxtı və ya qəzet meydançası alırlar.

Bunlar İctimai TV, "Azərbaycan", "Xalq", "Respublika" və "Bakinski raboçi"qəzetləridir.

Ancaq bu imtiyaza bütün dairələrdə namizədləri qeydiyyatdan keçmiş hakim Yeni Azərbaycan Partiyası malikdir.

Müxalifətyönlü Müsavat və  Real partiyalarının müvafiq olaraq 22 və 11 namizədi var.

Namizədlər 58 telekanal, radio və digər KİV-də ödənişli əsaslarla təşviqat apara bilərlər.

1 saniyəlik seçkiqabağı təşviqatın  qiyməti televiziyada 20-30 manat, radioda 7-25 manatdır. 

Çap və onlayn KİV-də reklam sahəsinin qiyməti 1000 manatdan başlayır.

Seçkiqabağı təşviqat avqustun 9-da başlayır və avqustun 31-də saat 08.00-da - səsvermənin başlanmasından bir gün əvvəl başa çatacaq.

Son məlumatlara görə, 125 yerlik parlamentə 950 namizəd qeydiyyata alınıb.

Namizədlərin qeydiyyatı prosesi avqustun 8-də saat 18.00-da başa çatır.