Milli Məclis insan hüquq və azadlıqları üzrə qurumların qərarlarının icrasının mümkünlüyü məsələsini müzakirə edəcək

Milli Məclisin yaz sessiyasının iş planına “İnsan hüquq və azadlıqlarının müdafiəsi üzrə dövlətlərarası orqanın qərarının Azərbaycan tərəfindən icrasının mümkünlüyü məsələsinin həlli haqqında” Konstitusiya qanununun layihəsinin müzakirəsi salınıb. 

Qanun layihəsinin hüquqi məzmununun necə olacağı ilə bağlı hər-hansı açıqlama verilməyib.

Milli Məclisin bir neçə deputatı da Turan-ın müxbiri ilə söhbətində belə bir qanun layihəsi ilə hələ tanış olmadığını bildirib.

Azərbaycan insan hüquq və azadlıqlarının müdafiəsi üzrə Avropa İnsan Hüquqları Məhkəməsinin, Avropa Şurasının, ATƏT-in, BMT-nin bir sıra qurumlarının üzvüdür.

Xatırladaq ki, 2015-ci ilin dekabrında Rusiya Avropa İnsan Hüquqları Məhkəməsinin bu ölkənin konstitusiyası ilə ziddiyyət təşkil edən qərarlarını qəbul etməyəcəyi barədə qərar qəbul edib. Rusiya belə halların istisna təşkil edəcəyini bildirib. Rusiya bu qərarı Avropa Məhkəməsinin Yukos şirkətinin səhmdarları ilə bağlı Rusiyaya qarşı qərarından sonra tətbiq edib. Məhkəmə Rusiyanın keçmiş səhmdarlara 50 milyard dollar təzminat ödəməli olduğu barədə qərar çıxarıb.

Bu sahədə ilk praktika isə 2004-cü ildə Böyük Britaniyada olub. Avropa İnsan Haqları Məhkəməsinin “Hers Böyük Britaniyaya qarşı” qərarı yerinə yetirilməyib. -03B-