Milli Məclisdə Xocalı soyqırımı haqqında qanun layihəsi

Azərbaycan Parlamentində Xocalı faciəsi haqqında qanun layihəsi hazırlanır, bu barədə bazar ertəsi Milli Məclis aparatının şöbə müdiri Nizami Səfərov bildirib. Onun sözlərinə görə, qanun layihəsində beynəlxalq cinayət törədənlərin ikinci dövlətə və ya beynəlxalq tribunala ekstradisiyası məsələsi əksini tapıb.

Qanun layihəsində beynəlxalq cinayət dedikdə aqressiv müharibənin planlaşdırılması, hazırlanması, başlanması və ya aparılması, bəşəriyyətə qarşı cinayətlər, hərbi cinayətlər, soyqırım və etnik təmizləmə nəzərdə tutulur, deyə Səfərov bildirib.

Qeyd edək ki, 1992-ci il fevralın 26-da erməni silahlı birləşmələri 366-cı Rusiya alayı ilə birlikdə Azərbaycanın Dağlıq Qarabağda əhəmiyyətcə ikinci şəhəri olan Xocalını ələ keçiriblər.

Döyüş əməliyyatları zamanı 600-dən çox dinc əhali qətlə yetirilib, min nəfərdən çox insan əsir götürülüb, 150 nəfərdən artıq insan itkin düşüb. Əsir düşənlər ələ salınıb və zorakılığa məruz qalıb.

Yüzlərlə dinc sakin Əskəran rayon mərkəzi yaxınlığında ermənilər tərəfindən soyuqqanlılıqla güllələnib. Əməliyyat Ermənistanın hazırkı prezidenti Serj Sarkisyanın rəhbərliyi ilə həyata keçirilib. Həmin vaxt o, Qarabağ separatçılarının silahlı qüvvələrinin komandanı idi.

Əməliyyatın bilavasitə komandiri polkovnik Arkadi Ter-Tadevosyan idi.

Həmin döyüşdə Ermənistanın keçmiş müdafiə naziri Seyran Ohanyan, baş qərargahın hazırki rəisi Movses Okapyan və digər zabitlər fəal iştirak ediblər.

Bu faciənin təqsirkarları arasında 366-cı alayın rus zabitləri də var. Azərbaycan Baş Prokurorluğunun müstəntiqlərindən ibarət xüsusi qrup bu faciədən təqsiri olan 80 nəfərə yaxın şəxsin adını müəyyən edib.

Bir sıra hüquq müdafiə təşkilatları Xocalı hadisələrini bəşəriyyətə qarşı cinayət kimi qiymətləndiriblər. -02D-