Milli QHT Forumu prezident vəzifəsini ləğv edib və sədrini seçib

Martın 14-də Bakıda Azərbaycan Milli QHT Forumunun onuncu qurultayı keçirilib.

Nümayəndələr Forumun Nizamnaməsinə dəyişiklik edərək, “prezident” vəzifəsini ləğv ediblər, əsas səlahiyyətlər Direktorlar Şurasına verilib, Direktorlar Şurasının üzvlərinin səlahiyyət müddəti 4 ildən 5 ilə qədər artırılıb.

İdarə Heyətinin sədri vəzifəsinə “Hüquqi təhlil və araşdırmalar İctimai Birliyi”nin rəhbəri Ramil İsgəndərli seçilib. 5 nəfərdən ibarət Şura seçilib.

Dövlət Milli QHT Forumuna dəstəyini ifadə edib, bu barədə qurultayda çıxış edən Prezident Administrasiyasının QHT-lərlə iş və kommunikasiya sektorunun müdiri Tural Əliyev və QHT-lərə Dövlət Dəstəyi Agentliyinin icraçı direktoru Aygün Əliyeva bildiriblər.

Tural Əliyevin sözlərinə görə, qarşıdakı dövrdə QHT sektorunda islahatlar dərinləşdiriləcək, QHT-lərin inkişafı, şəffaf və hesabatlı fəaliyyəti üçün imkanlar genişləndiriləcək.