Milli Şura: Dustağın qətli rejimin kriminallaşmasının göstəricisidir

Demokratik Qüvvələrin Milli Şurası (DQMŞ) 14 saylı həbsxanada davam gərginliyi pisləyən bəyanat yayıb.

Sənəddə keçən il dekabrın 22-də bu həbsxanada məhkum Elşad Babayevin işgəncə ilə qətlə yetirilməsindən sonra gərginliyin hələ də davam etməsinə diqqət çəkilir. Dustaqların bu qətlə etirazlarına cavab olaraq həbsxanaya qoşun yeridilməsi, yüzlərlə məhbusun işgəncəyə məruz qalması qeyd edilir. Bir çox  dustaqlar “kars”a salınıb, bir çoxları “tubzon” adlı zonada saxlanılır, məhbuslara yaxınları ilə görüş verilmir. Sənəddə dustaqların bu əraziyə işgəncələri ört-basdır etmək məqsədilə aparıldığı deyilir.   

Sənəddə məhkum E.Babayevin Penitensiar Xidmətin əməkdaşları tərəfindən qətlə yetirilməsi adi hadisə kimi yox, Əliyev rejiminin ölkə vətəndaşına münasibətinin göstəricisi, ölkədəki rejimin kriminallaşması kimi dəyərləndirilir.   

Milli Şurası dustaq E.Babayevin Penitensiar Xidmətin əməkdaşları tərəfindən işgəncə verilərək qətlə yetirilməsini, qatillərinin hələ də tapılmamasını, etiraza qalxan dustaqlara  zorakılıq və işgəncələri   pisləyir ,  ”kars”a salınan, “tubzon”da saxlanılan dustaqlara yaxınları ilə görüş verilməsini tələb edir.