Milli Şura Məhəmməd Əmin Rəsulzadənin abidəsi önündə tədbir keçirib

Bakı/31.01.18/Turan: Demokratik Qüvvələrin Milli Şurası (DQMŞ) yanvarın 31-də Novxanı kəndində Cümhuriyyət qurucusu Məhəmməd Əmin Rəsulzadənin anadan olmasının 134-cü ildönümü ilə bağlı anım tədbiri keçirib.

Ayrı-ayrı natiqlər Cümhuriyyətin xadimləri, onların yaşam və düşüncə tərzi barədə danışıblar. Mövcud hakimiyyəti Cümhuriyyətin 100 illiyi ilə bağlı qərar verməsinə baxmayaraq, Cümhuriyyət qurucularına və dəyərlərinə sayğısızlıqda, laqeydlikdə qınayıblar.

Milli Şuranın Koordinasiya Mərkəzinin üzvü İbrahim İbrahimli çıxışında Cümhuriyyətin baş naziri Nəsibbəy Yusifbəylinin pul təmənnası ilə atasına məktubunu xatırladıb. "Bir tərəfdə xalqın olanını götürməyən baş nazir, indi isə bir tərəfdə xalqın olanını talan edən hakimiyyət var" deyən İ.İbrahimli iki hakimiyyət arasında müqayisə aparıb.

Azərbaycan Xalq Cəbhəsi Partiyasnın sədri Əli Kərimli M.Rəsulzadəni böyük milli lider adlandıraraq anadan olmasının 134-cü ilini alqışladıqlarını bildirib: "Biz hər il iki dəfə olmaqla neçə ildir ki, bura sevə-sevə gəlirik, amma bu il xüsusilə əlamətdardır. Belə ki, M.Rəsulzadənin şah əsəri olan Azərbaycan Cümhuriyyətinin 100 illiyidir. Bu il həm də Azərbaycan milli-azadlıq hərəkatının lideri Əbülfəz Elçibəyin anadan olmasının 80 illiyidir. Odur ki, sizləri cümhuriyyət dəyərləri uğrunda ciddi mübarizəyə dəvət edirəm".

AXCP sədri Cümhuriyyəti xalqın özgüvənc, daimi qürur yeri adlandırıb. İndiki hakimiyyətə gəlincə, Ə.Kərimli vurğulayıb ki, bu hakimiyyət ölkənin adını ancaq beynəlxalq "qara siyahı"lara salmağı bacarıb.

AXCP sədri M.Rəsulzadənin adının daim ucalarda olacağını vurğulayıb, həm də indiki hakimiyyətin Cümhuriyyət qurucularına qərəzli münasibətinin əsaslarına toxunub. "Bir tərəfdə hakimiyyəti xalqın xidmətinə gətirən cümhuriyyət var, digər tərəfdə xalqın hakimiyyətini mənimsəyən iqtidar, bir tərəfdə xalqa xidmət edən zehniyyət var, digət tərəfdə xalq malını talan edənlər. Bir tərəfdə azadlıq düşüncə tərzi var, digər tərəfdə avtoritar hakimiyyət. Ona görə də birincinin xalqa təqdim edilməsini istəmirlər. Amma bizim yolumuz Cümhuriyyət, Rəsulzadə yoludur", - Ə.Kərimli vurğulayıb.

Ə.Kərimli hesab edir ki, buna görə də hakimiyyət Cümhuriyyətçiləri xalqa unutdurmaq istəyir, amma 70 il sovet rejimi bu insanları xalqa unutdura bilmədisə indiki hakimiyyət də bunu bacarmayacaq.

Ə.Kərimli deyib ki, Cümhuriyyətin 100 illik yubileyi ölkəni dünyaya tanıtmaq fürsəti idi, amma iqtidar bundan istifadə edə bilmədi, çünki cümhuriyyətçiliyin qədrini bilmir, qədrini bilmədiyi üçün də ölkənin adını ancaq qara siyahılarda tapmaq olur. "100 il bundan əvvəl Azərbaycan xalqı dünyaya demokratik dövlət bəxş etmişdi, 100 il sonra isə həmin ölkədə avtortar rejim boy göstərir", - o qeyd edib.

"Biz böyük lideri, fikir adamını, azadlıq ideoloqunu anmağa gəlmişik", - Milli Şuranın sədri Cəmil Həsənli olunan M.Rəsulzadəni belə dəyələndirib.

C.Həsənli M.Rəsulzadənin şəxsiyyət möhtəşəmliyini saxlayan nadir şəxsiyyətlərdən biri olduğunu deyib və bu şəxslərin yoxdan dövlət, bayraq yaratdığını qeyd edib.

C.Həsənli mövcud hakimiyyəti Cümhuriyyət liderlərinə sayğısızlıqda ittiham edib: "Hara baxırsan heykəl qoyurlar, amma bu hakimiyyətin ləyaqəti çatmadı ki, Cümhuriyyət qurucuları olan babalara heykəl qoysunlar, bir heykəl qoymağa yer tapılmır".

Mili Şuranın sədri vurğuladı ki, indiki hakimiyyət Cümhuriyyətin 100 illiyi ilə bağlı qərarı verəndə də səmimi olmayıb: "Həmin qərarda Bakıxanovdan belə ziyalıların adları çəkilir və oradan da Heydər Əliyevin adnın çəkilməsinə keçilir. Sanki Cümhuriyyət göbələk kimi yerdən çıxıb, onun uğrunda mübarizə olmayıb. Cümhuriyyəti quran şəxslərin adları çəkilmir".