Milli Şura prezident seçkilərinin nəticələrinə etimad olmayacağını bəyan edir (YENİLƏNİB)

Demokratik Qüvvələrin Milli Şurasının (DQMŞ) prezidentliyə namizədi Cəmil Həsənlinin Seçki Qərargahı prezident seçkilərinin səsvermə mərhələsindəki seçki pozuntuları ilə bağlı bəyanat yayıb. 

Müəlliflər oktyabrın 9-da səsvermə prosesi başladığı andan ölkə ərazisindəki bütün seçki məntəqələrində səsvermənin nəticələrinə ciddi təsir edəcək qanun pozuntuları, saxtalaşdırmalar olması haqda məlumatlar aldıqlarını nəzərə çatdırırlar. Qanun pozuntuları haqda xəbərlər təkcə C.Həsənlini seçki məntəqələrində müxtəlif səviyyədə təmsil edən şəxslərdən deyil, həm də səs verən tərəfsiz seçici və müşahidəçilərdən, mediadan da əldə edilir. 

Pozuntular bütün ölkə boyu kütləvi hal alıb, ancaq “Yeni Azərbaycan” partiyasının namizədi İlham Əliyevin xeyrinə edilir. Bu pozuntular həm də C.Həsənlinin seçki qələbəsinin qarşını almaq məqsədi daşıyır.

Səsvermənin ilk saatlarından C.Həsənlini təmsil edən və müstəqil müşahidəçilərə təzyiqlər başlayıb. Çox hallarda müşahidəçilər seçki məntəqələrinə buraxılmayıb, bəzi yerlərdə müşahidə aparmağa imkan verilməyib və ya seçki məntəqəsindən zorla çıxarılıblar. Bəzi seçki məntəqələrində müşahidəçilərin polis tərəfindən həbs edilməsi xəbərləri var. 12 saylı dairədə isə müşahidəçi Xəqani Əliyev polis tərəfindən oğurlanıb.

Seçki bülletenlərinin sayılmasında, saxlanılmasında, seçicilərə verilməsində qanunun tələbləri pozulub. Əksər məntəqələrdə seçki bülletenlərinin sayılmasında C.Həsənlinin müşahidəçilərinin iştirakı təmin edilməyib, bəzi məntəqələrdə isə seçki bülletenləri sayılmayıb. Səsvermə inzibati resurslardan kütləvi sui-istifadə halları ilə keçir, dövlət idarələri əməkdaşlarını səsverməyə gətirərək İ.Əliyevə səs vermələrini təmin etməklə məşğuldurlar. Hakimiyyət orqanları təzyiqlər nəticəsində hətta özəl qurumları da öz işçilərini YAP-ın namizədinə səs verməyə məcbur ediblər. Bütün dairələrdə “karusel”, yəni ayrı-ayrı qrupların eyni və müxtəlif seçki məntəqələrində təkrar-təkrar səs verməsi halları qeydə alınıb. Seçicilərə pul paylanması halları barədə məlumatlar daxil olub. 

Səsvermə prosesi başlamamış məntəqələrə içi bülletenlərlə doldurulmuş seçki qutuları  gətirilib, seçki komissiya üzvlərinin və kənar şəxslərin seçki qutularına topa halında seçki bülletenləri atmaları qeydə alınıb. Məntəqələrdə şəxsiyyət vəsiqəsi, adları seçki siyahısında olmayanlara, başqa ərazidə qeydiyyatda olanlara, bir neçə şəxsiyyət vəsiqəsilə səsverməyə gələnlərə bülletenlər verilib. Çoxsaylı seçicilər müxtəlif məntəqələrdə qeydiyyatdan çıxma vəsiqəsilə səs verir.

Səsvermə günü baş verənlər sübut edir ki, seçkilərin səsvermə mərhələsinə qədərki dövlərindəki qeyri-demokratik şərait, ciddi qanun pozuntuları, inzibati resurslardan kütləvi sui-istifadə seçki günü də davam edib. Amma səsvermə daha kütləvi, daha kobud pozuntularla, nəticələrə əsaslı şəkildə təsir edən amillərlə başlayıb, hələ də davam edir.

Seçki prosesinin gedişi göstərir ki, iqtidar səsvermənin nəticələrini saxtalaşdırmaq yolu ilə İ.Əliyevi yenidən prezident elan etmək istəyir. Bu halda demokratik, ədalətli, şəffaf seçkilərdən söhbət gedə bilməz. Odur ki, seçkilərdə iqtidara alternativ siyasi qüvvə kimi çıxış edən Milli Şura, ölkə cəmiyyəti, demokratik qüvvələr, demokratiya tərəfdarı olan beynəlxalq qurum və müşahidəçilər bu seçkiləri azad və ədalətli sayaraq, onun nəticələrinə etimad göstərə bilməz. -05D- 

2013 Oktyab 09 (Çərşənbə) 14:25:46

Demokratik Qüvvələrin Milli Şurası prezidentliyə namizədi Cəmil Həsənlinin Seçki Qərargahı seçki pozuntuları haqda növbəti bülleten yayıb.  

113 saylı Şəki şəhər seçki dairəsinin 9 saylı seçki məntəqəsində seçicilərin barmaqlarının boyanması üçün mürəkkəb yoxdur. Bu məntəqədə başqa rayonlarda qeydiyyatda olan şəxslərin səs verməsinə imkan yaradılaraq “karusel” əməliyyatı keçirilir. Eyni hal 61 saylı Neftçala seçki dairəsinin 2-6 saylı məntəqlərində, 34 saylı Xətai II secki dairəsinin 15 saylı məntəqəsində baş verir. Bu məntəqədə pozuntuları qeydə alan Elnur Məcidli seçki komissiyasının işində iştirak etməyə imkan verilməyərək polis vasitəsilə məntəqədən çıxarılacağı ilə hədələnib.

10 saylı Binəqədi seçki dairəsinin 31, 33, 34 saylı məntəqələrində, 54 saylı Şabran-Siyəzən seçki dairəsinin 8 saylı məntəqəsində 3 nəfərlik qrup 8 seçici əvəzinə səs verib, “karusel” əməliyyatları keçirilir. 91 saylı Ucar seçki dairəsinin 1 saylı məntəqəsində seçki bülletenlərinin küncləri kəsilərək seyflərə qoyulub, qutulara bülletenlər topa şəkildə atılır. 

27 saylı Sabunçu I seçki dairəsinin 15 saylı məntəqəsində bu ərazidə qeydiyyatda olmayan şəxslər səs verirlər, bülletenlər seçki qutularına topa şəklində atılır.

Onu da qeyd edək ki, artıq bir neçə məntəqələrdə saxta bülletenlər aşkar olunub. Bülletenlər kəsilmiş halda prezident İlham Əliyevin adı işarələnib. Yerli müşahidəçilər artıq həmin pozuntunu çəkib sosial şəbəkələrdə paylaşıblar. -05D-

2013 Oktyab 09 (Çərşənbə) 13:25:09

Milli Şuranın Seçki Qərargahı seçki prosesinin səsvermə mərhələsindəki pozuntular haqda növbəti bülleten yayıb. 

55 saylı Xaçmaz şəhər seçki dairəsi üzrə Milli Şuranın məşvərəçi səs hüuqulu komissiya üzvü Ramiz Mustafayev 1 saylı  saylı məntəqəsində olarkən polis tərəfindən məntəqədən çıxarılıb və polis idarəsinə aparılıb.

17 saylı Oğuz-Qəbələ seçki dairəsinin Şirvanlı kənd 20 saylı seçki məntəqəsində müşahidəçi Ramin Musayev kənd sahə müvəkkili və icra nümayəndəsinin seçki məntəqəsi önündə səsverməyə gələn seçicilərə təsir göstər diyini bildirir. 

34 saylı Xətai ikinci seçki dairəsinin 7 saylı məntəqəsində bir seçici seçki qutusuna 7 bülleten atarkən saxlanılıb. 

64 saylı Sabirabad ikinci seçki dairəsinin 10 saylı Moranlı məntəqəsində məşvərətçi səs hüquqlu komissiya üzvü Mikayıl İsmayılov seçki mıəntəqəsindən çıxarılaraq müşahidə aparmasına imkan verilməyib, 

29 saylı dairənin 17-18-19 məntəqələrində 51-162 saylı məktəbin müəllimləri karusel əməliyyatında iştirak edir. 

8 saylı Binəqədi birinci seçki dairəsinin 4-5 saylı məntəqələrində seçicilər xarici  pasportu ilə səs verir, müşahidəçilərə müşahidə imkanı verilmir. 

57 saylı Kürdəmir seçki dairəsinin 26 saylı məntəqəsində seçki qutusuna bülletenlər topa şəkildə atılır. 

81 saylı Neftçala seçki dairəsinin 4-6 saylı məntəqələri vaxtında açılmayıb, seçki bülletenləri sayılmadan səsvermə başlayıb.

15 saylı Yasamal birinci seçki dairəsinin 22 saylı məntəqəsində səsvermə elan olunmadan öncə içəridə bir qrup seçiciyə seçki bülleteni verilərək səsvermə başlanıb. Bu dairənin 23 saylı seçki məntəqəsinə 22 saylı mənzi istismar idarəsindən karusel üsulu ilə seçiciər gətirilir. 

34 saylı Xətai ikinci seçki dairəsinin 30 saylı məntəqəsində “karusel” əməliyyatı həyata keçirən qrupu mobil telefon vasitəsilə çəkərkən, seçki komissiyasının sədri və katibi Milli Şuranın nümayəndəsi Sevil Məmmədovanın mobil telefonunu zorla əlindən alıblar.-05D- 

2013 Oktyab 09 (Çərşənbə axşamı) 10:54:44

Demokratik Qüvvələrin Milli Şurasının prezidentliyə namizədi Cəmil Həsənlinin Seçki Qərargahı prezident seçkilərinin gedişində pozuntular olduğunu bildirir. 

120 saylı Cəbrayıl-Qubadlı seçki dairəsinin 46 saylı məntəqəsində Milli Şura müşahidəçiləri saat 7:45-də hələ seçkilərin başlanmasına qədər seçki qutularına böyük miqdarda seçki bülletenləri atılmasını qeydə alıblar. 

55 saylı Xaçmaz seçki dairəsinin 1 saylı məntəqəsində yerli hakimiyyət büdcə təşkilatları nümayəndələrini kütləvi şəkildə səsverməyə gətirib. 

36 saylı Xətai seçki dairəsinin 16-18 və 36 saylı məntəqələrində C.Həsənlinin müşahidəçiləri məntəqələrə buraxılmayıblar. 

19 saylı Nərimanov rayon birinci seçki dairəsinin 30 saylı məntəqəsində bülletenlər müşahidəçilərdən kənar sayılıb. Bütün seçki qutuları səsvermə otağında yerləşdirilməyib.

8 saylı Binəqədi birinci seçki dairəsinin 30 saylı məntəqəsində bu ərazidə qeydiyyatda olmayan məntəqəyə gələn hər kəsə “hamının səs vermək hüququ var” adı altında seçki bülleteni verilir. 

82 saylı Ağcabədi seçki dairəsinin 3 saylı məntəqəsində bülletenlərin kütləvi şəkildə qutulara doldurulması halı qeydə alınıb. 

Binəqədi birinci seçki dairəsinin 20-22 saylı seçki məntəqələrində 8 nəfərdən ibarət dəstənin bu məntəqələrdə bir neçə dəfə səs verdiyi qeydə alınıb.    

Sabunçu rayon ikinci seçki dairəsinin 27 saylı məntəqəsində seçicilər səsverməyə barmaqları rəngsiz mürəkkəblə nişanlamadan buraxılıblar. 

Saat 10:30-a qədər olan müddət ərzində DQMŞ 4 bülleten dərc edərək ölkənin müxətlif regionlarında 50-yə yaxın seçki pozuntuları barədə məlumat verib. -0-