Milli Şura Qərb Azərbaycanda demokratları dəstəkləməyə çağırır

Rüstəm İbrahimbəyovun sədrliyi ilə Milli Şura üzvlərinin Tbilisi görüşünün yekunlarından biri Amerika və Avropa qurumlarına müraciətlərin qəbulu olub. Turan-a daxil olan müraciətin  mətnində deyilir ki, bu il dinc, azad seçkilərin keçirilməsi və demokratiyaya yumşaq keçid üçün Azərbaycana son imkanı verir.

“Biz Amerika və Avropa təşkilatlarına və institutlarına müraciət edərək onları Azərbaycanın öz sonuncu şansını necə itirdiyini müşahidə edərək kənarda durmamağa çağırırıq”.

İyulun əvvəlində ABŞ Konqresinin nümayəndə heyəti İlham Əliyevlə görüşündə müxalifətin vahid namizədi Rüstəm İbrahimbəyovun  seçkilərə buraxılmamasının mümkünlüyü ilə bağlı narazılığını bildirib. Onlara zəmanət verilib ki, R.İbrahimbəyovun iştirakına heç bir maneə olmayacaq. 

Lakin Azərbaycan hakimiyyəti belə güclü namizəddən qorxur və odur ki, indiyədək seçkilərə ATƏT və Avropa Parlamentindən müşahidəçilər dəvət etməyiblər.

R.İbrahimbəyova qarşı uydurma ittihamlara son qoyulmur. Kino işçilərini ona qarşı yalan ifadələr verməyə məcbur edirlər. Onları korrupsiyada və rüşvətxorluqda ittiham edirlər və bütün bunların arxasında R.İbrahimbəyovun dayandığını söyləməyə məcbur edirlər. 

Bütün bunlara inanacaq insan tapmaq çətindir. Onların məqsədi R.İbrahimbəyova qarşı cinayət işi qaldırmaqdır ki, Bakıya gələndə həbs etsinlər və seçkilərdə iştiraka buraxmasınlar.

Hakimiyyətin bu cür aqressiv hərəkəti göstərir ki, onlar R.İbrahimbəyovu həbs etmək niyyətindədir. 

Bununla əlaqədar Milli Şura ABŞ Konqresinə, BMT, Avropa Şurası, ATƏT və Avropa Parlamentinə müraciət edərək buna yol verməməyə çağırır. Milli Şura beynəlxalq birliyi Azərbaycan xalqının yanında olmağa və hökumətdən öz öhdəliklərimnə və vədlərinə əməl etməyi, R.İbrahimbəyovun qarşıdakı seçkilərdə iştirakına şərait yaratmağı tələb etməyə çağırır”, - müraciətdə deyilir.02D-