Milli Şura siyasi repressiyaların güclənməsini pisləyən bəyanatla çıxış edib

Demokratik Qüvvələrin Milli Şurası (DQMŞ) son zamanlar hakimiyyətin siyasi repressiyaları gücləndirməsi ilə bağlı bəyanat yayıb. Bəyanatda deyilir: 

“Bu ilin əvvəlindən hakimiyyətin siyasi fəaliyyətin məhdudlaşdırması, siyasi baxışlarına görə insanların təqib edilməsi istiqamətində başlatdığı siyasət davam etməkdədir. Müsavat Partiyası başqanının müavini Tofiq Yaqublunun və “Real” vətəndaş hərəkatının sədri İlqar Məmmədovun İsmayıllı hadisələrinə görə ittiham olunaraq həbs edilməsi, daha sonra NİDA Gənclər Hərəkatının üzvlərinin həbsi ilə davam edib. Bir müddət əvvəl səsləndirdiyi fikirlərə görə, tanınmış hüquqşünas Qurban Məmmədov qondarma ittihamlarla azadlıqdan məhrum edilib. İqtidarın yürütdüyü repressiya siyasəti nəticəsində Tural Həsənzadə, Daşqın Məlikov, İlqar Rzayev, Hilal Məmmədov, Nigar Yaqublu, Əvəz Zeynallı, Nemət Pənahlı, Tale Bağırzadə, Abgül Süleymanov, Mövsüm Səmədov, İlham Əmiraslanov, İlkin Rüstəmzadə, Bəxtiyar Quliyev, Məmməd Əzizov, Rəşad Həsənov, Şahin Novruzlu, Üzeyir Məmmədli, Zaur Qurbanlı, Rəşadət Axundov, Nicat Əliyev məhz siyasi baxışlarına görə azadlıqdan məhrum ediliblər. 

Hazırda hakimiyyət yeni repressiya dalğasına start verib. Hakimiyyət seçki öncəsi təqiblərini davam etdirərək, Müsavat Partiyası başqanının müşaviri Yadigar Sadıqovun haqqında Cinayət Məcəlləsinin 221.3-cü maddəsi (xuliqanlıq) ilə cinayət işi açaraq Lənkəran Rayon Məhkəməsi istintaq orqanının təqdimatına əsasən onun barəsində 2 aylıq həbs qətimkan tədbiri seçib. 

Milli Şura Y.Sadıqovun şərlənərək həbs olunmasını Müsavat ideyalarını Lənkəran və ətraf rayonlarda yorulmadan ardıcıl olaraq təbliğ etməsinə cavab olaraq hakimiyyət tərəfindən həyata keçirildiyini və bu həbsin siyasi xarakterli olduğunu bildirir. Milli Şura eyni zamanda keçmiş deputat Hüseyn Abdullayev, keçmiş korpus komandiri İsa Sadıqovyn barəsində qaldırılmış cinayət işlərini, Prezident Administrasiyasının İşlər İdarəsinin sabiq müdiri Akif Muradverdiyevin həbsini hakimiyyətin cəmiyyətdə xof yaratmaq, toplumda siyasi aktivliyin qarşısının alınmasına cəhd kimi dəyərləndirir. Milli Şura Azərbaycan hakimiyyətinin siyasi opponentlərinə və müstəqil mövqedə çıxış edən siyasi-ictimai xadimlərə qarşı yol verilən qanunsuzluqları pisləyir və siyasi motivlərlə həbsə atılanların dərhal həbsdən azad olunmasını, siyasi təzyiqlərə son qoyulmasını tələb edir.    

Milli Şura bəyan edir ki, hakimiyyətin demokratik qüvvələrin Azərbaycanda azad və ədalətli seçkilər uğrunda mübarizəsinin qarşısını siyasi repressiyaları gücləndirməklə almaq heç bir nəticə verməyəcək”, - sənəddə qeyd edilir.  

Xəbəri Milli Şuranın İcra Aparatının mətbuat xidməti yayıb. -03D-