Moskva Ankaranı Ermənistan-Azərbaycan münaqişəsində ölçülüb-biçilmiş yanaşmaya çağırıb

Moskva/24.07.20/Turan: İyulun 23-də Rusiyanın xarici işlər naziri Sergey Lavrovla Türkiyənin xarici işlər naziri Mövlud Çavuşoğlu arasında telefon danışığı olub.

RF XİN-in mətbuat xidmətinin məlumatına görə, tərəflər bu yaxınlarda Ermənistanla Azərbaycan arasında zorakılığın eskalasiyası ilə bağlı fikir mübadiləsi aparıblar.

“Rusiya tərəfi vəziyyətin daha da gərginləşməsinə yol verilməməsi, Ermənistan-Azərbaycan sərhəddində təhlükəsizliyin təmin edilməsi, Dağlıq Qarabağ münaqişəsinin nizamlanması üzrə səylərin artırılması məqsədilə ölçülüb-biçilmiş yanaşmaların nümayiş etdirilməsinin və münaqişəyə cəlb olunmuş tərəflərə təmkinli təsirin göstərilməsinin zəruriliyini vurğulayıb. Regionda sabitliyə nail olmaq məqsədilə Moskva və Ankara arasında qarşılıqlı fəaliyyəti inkişaf etdirmək haqda razılığa gəlinib”, - məlumatda bildirilir.

Öz növbəsində, Türkiyə XİN bildirib ki, tərəflər “Ermənistan Silahlı Qüvvələrinin Azərbaycana qarşı təxribatlarını müzakirə ediblər, həmçinin Liviyadakı vəziyyətlə bağlı fikir mübadiləsi aparıblar”. -02D-