Moskva Bakı və Yerevan arasında gərginliyin səngiməsi üçün addımlar atır

Moskva/24.07.20/Turan: Atəşkəs rejiminin pozulması səngisə də gərginlik davam edir. Rusiya gələcək eskalasiyanın gərginləşməsinin qarşısını almaq üçün ATƏT-in Minsk Qrupu çərçivəsində, eləcə də müstəqil şəkildə konkret addımlar atır. Bu barədə RF XİN mətbuat katibi Mariya Zaxarova cümə axşamı keçirilən brifinqdə bildirib.

“Ötən həftə münaqişə zonasında vəziyyətə Minsk Qrupunun iclasında, sonra isə ATƏT-in Daimi Şurasında təşkilatın bütün üzvlərinin iştirakı ilə baxılıb.

Minsk Qrupunun həmsədrləri tərəflərlə daimi əlaqə saxlayırlar. Bir müddət öncə onların ATƏT-in fəaliyyətdə olan sədri  E. Rama və ATƏT-in baş katibi T.Qreminger ilə məsafəli görüşləri keçirilib, BMT Katibliyi ilə məsləhətləşmələr planlaşdırılır.

Tərəflərə maksimum təmkinlilik göstərmək və atəşkəs rejiminə ciddi əməl etmək çağırışı ilə bir sıra bəyanatlar, o cümlədən Prezident Administrasiyası və Rusiya XİN xəttilə bəyanatlar verilib.

Rusiyanın xarici işlər naziri S. V. Lavrovun  ermənistanlı və azərbaycanlı həmkarları ilə ekstren telefon əlaqələri olub. Bu həftə o, Azərbaycan və Ermənistanın Moskvadakı səfirləri ilə vəziyyəti müzakirə edib. Hərbi idarələrin xətti ilə qarşılıqlı fəaliyyət həyata keçirilir.

Yerevan və Bakı barışın möhkəmləndirilməsinə və danışıqlar prosesinin canlandırılmasına yönələn müxtəlif təşəbbüslərlə çıxış edirlər. Onları tərəflərlə müzakirə edirik. Ümid edirik ki, beynəlxalq səfərlərə məhdudiyyətlər aradan qaldırıldıqdan sonra münaqişənin nizamlanması ilə bağlı bütün kompleks məsələlərin üzərində predmetli şəkildə işləmək imkanı yaranacaq”, - deyə o bildirib”.-02D-