Moskva Vardanyanın öz adamı olduğunu etiraf edir və gələcəkdə ondan istifadə edəcəyinə ümid bəsləyir

Bakı/28.02.23/Turan: Rusiya Elmlər Akademiyası Şərqşünaslıq İnstitutunun direktor müavini Aleksandr Skakov Ruben Vardanyanın istefasını belə şərh edib: "Bu, Qarabağın mövqeyini zəiflədən əlavə amildir. Biz bununla bağlı Vardanyana olduqca ciddi ümidlər bəsləyirdik və bunun baş verməsi çox kədərlidir".

Skakov bildirib ki, Vardanyanın Qarabağda perspektivləri ola bilər. "Əgər indiki böhran vəziyyətindən çıxmaq mümkün olarsa (Qarabağ üçün- red.), düşünürəm ki, Vardanyanın hansısa perspektivləri var",- o deyib.

Moskvada Vardanyanın Ermənistanda siyasi fiqur olma ehtimalı nəzərə alınır. Lakin Skakovun sözlərinə görə, bundan ötrü Vardanyanın Ermənistanda öz siyasi gücünü, partiyasını yaratması lazımdır.

Skakov Vardanyan gedəndən sonra Bakının "Laçın dəhlizini açacağına" şübhə etdiyini bildirib.

Bakı və Yerevan arasındakı çətin danışıqları şərh edən Skakov danışıqlar masasında mövcud olan yeganə sənədə söykənir ki, "bu da hələlik Azərbaycanı qane edir, bəlkə də Ermənistanda da kimisə qane edir-bu layihədə fakt kimi Arsax yoxdur. Yəni, Ermənistanla Azərbaycan arasında sülh müqaviləsi Azərbaycanın ərazi bütövlüyünün Ermənistan tərəfindən tanınması və Qarabağa dair hər hansı xatırlatmanın və ona görə hər hansı məsuliyyətin tamamilə olmaması ilə əlaqədar sülh müqaviləsidir",-o deyib.---0—