Moskva və Ankara Qarabağ üzrə vahid mövqelərini bəyan edirlər

Bakı/29.12.20/Turan: Türkiyə Rusiya ilə qarşılıqlı fəaliyyətin möhkəmləndirilməsində və dərinləşdirilməsində maraqlıdır. Bu barədə Türkiyənin XİN başçısı Mevlut Çavuşoğlu Soçidə Rusiyalı həmkarı Sergey Lavrovla Birgə Strateji Planlaşdırma Qrupunun iclasının yekunlarına görə bildirib.

Çavuşoğlunun sözlərinə görə, koronavirus pandemiyası fonunda 2020-ci ildə Türkiyə və Rusiya arasında ticarət dövriyyəsi 20% azalıb. “Bu trendin qarşısı operativ şəkildə alınmalıdır. Tərəflər bundan sonra ticarət yolundakı maneələrin aradan qaldırılması üzrə addımlar atmalı, norma və məhdudiyyətləri ləğv etməlidir”, deyə Çavuşoğlu bildirib.

Türkiyə diplomatiyasının rəhbəri Rusiya tərəfindən Türkiyə vətəndaşları üçün viza rejiminin sadələşdirilməsinin əhəmiyyətini də qeyd edib. “Rusiya vətəndaşları Türkiyəyə hər hansı viza tələbi ilə qarşılaşmadan gəlirlər. Rusiya tərəfindən də analoji addım atılacağına ümid edirik”, deyə Çavuşoğlu bildirib.

Onun sözlərinə görə, Cənubi Qafqazda baş verən son hadisələr iki ölkə arasındakı əməkdaşlığın əyani dəlili olub. “Biz Dağlıq Qarabağ məsələsində uzunmüddətli sülh və sabitliyin tərəfdarıyıq. Ümid edirik ki, regiondakı müşahidə missiyaları əməkdaşlıq mühiti üçün yer qoyacaq”, deyə Çavuşoğlu bildirib.

Öz növbəsində, Rusiyanın XİN başçısı Sergey Lavrov bildirib ki, tərəflər Dağlıq Qarabağda noyabrın 9-da əldə edilmiş razılaşmaların yerinə yetirilməsinə nəzarət üzrə Birgə Monitorinq Mərkəzinin açılması ilə bağlı məsələləri müzakirə ediblər. Onun sözlərinə görə, tərəflərin “xarici muzdluların bu regiona daxil olmasına” yol verməməklə bağlı mövqeyi tamamilə üst-üstə düşür. -02D-