Moskvada Xəzərin statusu üzrə işçi qrupun 45-ci iclası keçirilib

İyunun 8-10-da Moskvada Xəzər dənizinin hüquqi statusuna dair Konvensiyanın  hazırlanması üzrə Xəzəryanı dövlətlərin xarici işlər nazirlərinin müavinləri səviyyəsində xüsusi işçi qrupunun 45-ci iclası keçirilib.

XİN mətbuat xidmətinin məlumatında deyilir ki, Azərbaycan nümayəndə heyətinə nazir müvaini Xələf Xələfov rəhbərlik edib.

İclasın yekunlarına dair kommunikedə deyilir ki, nümayəndə heyətlərinin rəhbərləri Xəzəryanı dövlətlərin xarici işlər nazirlərinin qarşıdakı Qazaxıstan müşavirəsi baxımından iclasın əhəmiyyətini qeyd ediblər. Həmçinin Xəzər dənizinin hüquqi statusuna dair Konvensiyanın üzərində işin tezliklə başa çatdırılmasının vacibliyi vurğulanıb.

İlkin razılaşmaya uyğun olaraq diskussiyalar zamanı diqqət gəmiçilik rejimi, sahilyanı dövlətlərin Xəzər akvatoriyasında yurisdiksiyası, dibin bölünməsi  məsələlərinə yönəldilib.

Razılaşdırılmış formullar Konvensiya layihəsində əksini tapıb.

Nümayəndə heyətləri danışıqların yekunlarını müsbət qiymətləndiriblər və yüksək səviyyədə görüşün təşkilinə görə Rusiya tərəfinə təşəkkür ediblər.

Növbəti iclas Qazaxıstanda olacaq. Görüşün vaxtı diplomatik kanallarla razılaşdırılacaq.06d--