Müdafiə Nazirliyi və BQXK 70 ölkənin hərbiçiləri üçün SWIRMO seminarı keçirir

Dünyanın 70-dən çox ölkəsindən olan yüksək rütbəli zabitlər 7-12 oktyabr 2024-cü il tarixlərində keçiriləcək dünyanın müharibə aparılması qaydalarına həsr olunmuş ən böyük seminarı olan "Hərbi əməliyyatların idarə olunmasına dair beynəlxalq qaydalara həsr olunmuş Seminar"ın (SWIRMO) 17-ci buraxılışında iştirak etmək üçün Bakı, Azərbaycanda toplaşıb. Tədbir Beynəlxalq Qızıl Xaç Komitəsi (BQXK) və Azərbaycan Respublikası Müdafiə Nazirliyinin təşkilatçılığı ilə keçiriləcək. 

BQXK mandatına müvafiq olaraq, beynəlxalq humanitar hüquq (BHH) barəsində bilikləri təbliğ etməyə, o cümlədən silahlı münaqişələr və digər zorakılıq hallarının təsirlərinə məruz qalmış insanların həyatını, şərəf və ləyaqətini qorumağa çalışır. 

Müharibə aparılmasının daim inkişaf etməkdə olan vasitələri təsirə məruz qalmış insanların hüquqlarına, təhlükəsizliyinə və müdafiəsinə hörməti təmin etmək məqsədilə BHH normalarının hərtərəfli şəkildə nəzərə alınmasını tələb edir, deyə BQXK-nın Bakı nümayəndəliyinin press-relizində bildirilir.

Seminarın məqsədi hərbi əməliyyatlarda rəhbər tutulan beynəlxalq qaydalar barəsində anlaşılmanı yaxşılaşdırmaq, müasir döyüş meydanında BHH-nin praktiki tətbiqi ilə bağlı çətinlikləri nəzərdən keçirmək, BHH-nin hərbi planlaşdırmaya, hərbi əməliyyatların aparılmasına və silahlı qüvvələrin etik davranış kodeksinə inteqrasiyası ilə bağlı ümumi ideyaya şərait yaratmaq, o cümlədən ortaq məkanda fəaliyyət göstərdiklərinə görə hərbi qulluqçular və BQXK arasında qarşılıqlı anlamanı yaxşılaşdırmaqdır.

İlk dəfə keçirildiyi 2007-ci ildən bəri SWIRMO BHH-nin mürəkkəb və sürətlə dəyişən mühitdə daha yaxşı başa düşülməsini və əməliyyat planlaşdırılmasında tətbiqini təbliğ etmək məqsədi daşıyıb. Seminar silahlı qüvvələrin silahlı münaqişə hüququna riayət və onun təbliği kimi hüquqi öhdəliklərinə hörmət etməsinə dəstək göstərir.