Müharibədən əvvəl Ermənistan Azərbaycandan 10:1 geridə idi – Paşinyan

Bakı/14.04.21/Turan: Azərbaycan kəşfiyyat peyki alarkən Ermənistan hakimiyyəti Yunan adalarında torpaq sahələri alırdı, “Azadlıq” radiosunun məlumatına görə, bu barədə aprelin 14-də Ermənistan baş naziri Nikol Paşinyan ölkə parlamentində bildirib.

2017-ci ildə əvvəlki hakimiyyət dövründə aparılmış təhlilə istinad edən Paşinyan qeyd edib ki, kritik infrastrukturun inkişafına görə Ermənistan Azərbaycandan şərti vahidlə 10-1 geri qalırdı.

Elə həmin təhlilə əsasən, Ermənistanda hərbi-sənaye sistemi 2016-cı ilin aprelindən sonra, Azərbaycandan 11 il gec formalaşmağa başlayıb.

“2017-ci ildə Azərbaycanın iki peyki var idi, onların biri ölkənin aldığı kəşfiyyat peykidir. Bəli, Azərbaycan kəşfiyyat peyki alırdı, Ermənistan hakimiyyəti isə yunan adalarında, Avropada, mümkün olan hər yerdə torpaq sahələri alırdı. Buna görə, qeyd etmək lazımdır ki, onlar institusional dövlət quruculuğu məsələsində uduzublar, dövləti Ermənistanın bütün həyati qüvvələrini istismar edən mafiya qurumuna çeviriblər və bu mafiya qurumlarının indiyədək məhkəmə sistemindən, təəssüf ki, Silahlı Qüvvələrə qədər hər yerdə əli var”, deyə Paşinyan bildirib.

“Biz etiraf etməliyik ki, bu 20 illik satqınlığa, 20 illik təslimiyyətçiliyə qarşı mübarizə aparırdıq. Amma müharibə zamanı belə onlar öz satqınlıqlarını gizlətmək üçün bizim ünvanımıza avazları çıxdığı qədər “satqın”, avazları çıxdığı qədər “təslimçi” deyə qışqıraraq öz məğlubiyyətlərinə bəraət qazandırırdılar. Təslimçi sizsiniz, satqın da sizsiniz, bunu 20 il Ermənistanı idarə edən və talayan elitaya deyirəm, biz isə hər gün sizin təslimiyyətçiliyinizə və satqınlığınıza qarşı ölüm-dirim mübarizəsi aparırdıq”, deyə o bildirib. -02D-