Atəşkəs əldə olunmasına baxmayaraq, münaqişədən sonrakı inkişafla bağlı çoxlu suallar qalmaqdadır

Bakı/14.04.21/Turan: Atəşkəs əldə olunmasına baxmayaraq, münaqişədən sonrakı inkişafla bağlı çoxlu suallar qalmaqdadır. Bunu aprelin 13-də Prezident İlham Əliyev ADA Universitetində keçirilən «Cənubi Qafqaza yeni baxış: münaqişədən sonra inkişaf və əməkdaşlıq» adlı beynəlxalq konfransdakı çıxışında bildirib.

Prezident qeyd edib ki, müharibədən sonrakı vəziyyət çox kövrəkdir.

Prezident İlham Əliyev bununla nə demək istəyib? Münaqişədən sonrakı inkişafla bağlı nə kimi suallar var?

Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov Turana bildirib ki, sözügedən konfransında Prezident İlham Əliyev postmüharibə dövrü ilə bağlı bir sıra olduqca mühüm məsələləri diqqət mərkəzində saxladı. «Bunlardan biri müharibədən sonrakı dövrdə mövcud narahatlıqlarla bağlı məsələdir. Bəli, bu gün atəşkəsdir, müharibə bitib, amma hələ də vəziyyətin gərginləşməsinə xidmət edə biləcək tendensiyalar var və cənab prezident buna diqqəti cəlb etdi. O, xüsusilə vurğuladı ki, Ermənistanda revanşist qüvvələr var. Onlar razılaşmaları həzm edə bilmirlər və revanşizm duyğu ilə yaşayırlar».

Deputat qeyd edib ki, bu kontekstdə ölkə prezidenti Rusiya və Ermənistan arasında hərbi əməkdaşlığın dərinləşdirilməsi və Ermənistan hərbi qüvvələrinin modernləşdirməsi məsələni diqqət mərkəzində saxladı. «Belə bir addımların atılması nəticə etibarilə revanşizm hissləri gücləndirir. Ermənistan Silahlı qüvvələrini müasir silahlarla təchiz edilməsi və bu sahədə Rusiya ilə əməkdaşlıq nəticə etibarilə regiondakı vəziyyətə mənfi təsir göstərir və ağır nəticələrə gətirib çıxara bilər».

E.Nəsirov vurğulayıb ki, bu vəziyyətdə Azərbaycan heç bir məsuliyyət daşımır. «Cənab Prezident dəfələrlə öz çıxışlarında bildirib ki, biz əməkdaşlıq mühitinə sadiqiq, Ermənistanla siyasi dialoq və iqtisadi əməkdaşlıq məsələlərinə yeni baxış ortaya qoymuşuq, amma bu baş tutmadığı və bizə qarşı yenə təxribata əl atacaqları təqdirdə dəmir yumruq yerindədir».

Komitə üzvü əlavə edib ki, dövlət başçısı işğaldan azad olunmuş ərazilərin kütləvi şəkildə Ermənistan tərəfindən minalanması məsələsini qabartdı. «Bu o deməkdir ki, Ermənistanla müharibə bitib, amma Ermənistan Azərbaycana mina xəritələrini vermir və deməli Ermənistan hələ də mina müharibəsini aparmaqdadır».

Deputatın fikrincə digər narahatlıq doğuran məsələ onunla bağlıdır ki, Ermənistan tərəfi hər dəfə müxtəlif instansiyalarda, tədbirlərdə 62 nəfər diversantın qaytarılması məsələsini gündəmə gətirir. «Halbuki onlar heç bir halda hərbçi sayıla bilməz, onlar diversantdır və müharibə bitdikdən sonra Azərbaycan ərazisinə basqı ediblər, mülki və hərbi şəxslərimizi qətlinə səbəb olublar. Həmin şəxslər yerli və beynəlxalq hüquq çərçivəsində məsuliyyət daşıyırlar».

E.Nəsirov qeyd edib ki, Prezident İlham Əliyev Hərbi qənimətlər parkın açılışı zamanı çıxışında Azərbaycan ordusu hazırda Ermənistanda revanşist qüvvələrinə başçılıq edən və hakimiyyətə gəlmək istəyən Köçaryan və Sərkisyanın ordusuna qalib gəldiyini deyib. «Cənab Prezidentin bu ismarıcın mənası odur ki, hakimiyyətə o Köçaryan iddialıdır ki, Azərbaycan ordusu məhz onun yaratdığı ordunu məhv edib. Dövlət başçısının həmin çıxışında Köçaryan və Sərkisyan rejimlərinin mahiyyətini ortaya qoyub və Ermənistanda qarşıdan gələn seçkilərdə ikisinə də vurulmuş diplomatik zərbədir».

«Atlas» Araşdırmalar Mərkəzinin rəhbəri Elxan Şahinoğlu AzadlıqRadiosuna bildirib ki, həmin suallar aydındır. «Laçın dəhlizinin nəzarətdən kənarda qalması, Xocalı və Şuşanın bəzi kəndlərin hələ də işğalın altında qalması, Xankəndinə azərbaycanlıların qayıtması məsələsi – bütün bunlar hələ də həll olunmayıb. Bəli, biz müharibədə qələbə çalmışıq, amma bəzi məsələlər hələ də həllini tapmayıb».

Ekspertin fikrincə, Prezident konkret məsələlərə toxunmadan deyib ki, həll olunmayan problemlər var. «Çünki bölgədə əlisilahlı separatçılar var və Rusiya sülhməramlıları onları tərksilah etməyiblər. Rusiya sülhməramlıların özləri ilə bağlı da xeyli suallar var. Modul tipli yerləşim yerlərini artırırlar, halbuki 10 noyabr bəyanatına görə onların sayı 1960 nəfər olmalıdır».

Politoloq qeyd edib ki, dövlət başçısı sualları cavablandırarkən bildirib ki, müharibə olmayacaq və problemləri həll etmək üçün Qarabağda növbəti müharibə gözlənilmir. «Amma bu o demək deyil ki, antiterror əməliyyatı olmayacaq. Mühatibədən sonra Azərbaycan ordusu iki antiterror əməliyyatını həyata keçirtdi. Yəni bu, istisna deyil».

E.Şahinoğlu vurğulayıb ki, Prezident İlham Əliyev çıxışında «İskəndər» raketləri ilə bağlı maraqlı fikirlər söylədi. «Prezident bunu ilk dəfə idi deyirdi ki, bu mövzunu Rusiya prezidenti Vladimir Putinlə müzakirə edib və İlham Əliyevin tapşırığı ilə Müdafiə Nazirliyi fotolarla birlikdə sübutları rəsmi Moskvaya göndərib, ancaq heç bir cavab alınmayıb».

Politoloqun fikrincə, bu o deməkdir ki, İlham Əliyev demək istədi ki, Putin ona tutarlı cavab verməyib. «Hərbi qənimətlər parkının açılışında da Prezident Rusiyanı nəzərdə tutaraq «Ermənistanda bu raketlər hardandır, axı bunlar onlarda olmamalı idi?» sualı verdi. İki gün ərzində İlham Əliyev Rusiyanın adını çəkmədən çox sərt tənqid etdi. Rusiyanın cavabı olacaq, amma böyük ehtimalla bu cavablar da bizi qane etməyəcək. Prezidentin çıxışlarından mən onu anladım ki, Rusiya ilə münasibətlərdə ciddi suallar var».--0--