Müsavat başqanı Arif Hacılının ABŞ-a səfəri

Bakı/21.05.19/Turan: Müsavat Partiyasının başqanı Arif Hacılı mayın 6-21-də ABŞ-a səfər edib, burada Amerika rəsmiləri və ictimai-siyasi dairələrinin nümayəndələri ilə görüşlər keçirib.

Müsavat-ın mətbuat xidmətinin məlumatına görə, səfər zamanı Hacılı ABŞ Dövlət Departamentinin Qafqaz məsələləri və regional münaqişələr şöbəsinin direktoru Alisia Ellison ilə görüşüb.

Söhbət zamanı demokratiya və insan hüquqları məsələləri ilə yanaşı, Qafqazda sabit sülhə nail olmağa mane olan münaqişələrin nizamlanması yolları da müzakirə olunub.

Xüsusən, Qarabağ münaqişəsinin nizamlanması üçün zəruri olan addımlardan danışılıb.

Hacılının ABŞ dövlət katibinin müavininin Demokratiya və İnsan Haqları məsələləri üzrə köməkçisi Maykl Kelleherlə görüşündə fundamental insan haqları, o cümlədən söz və ifadə azadlığı, sərbəst toplaşma və digər azadlıqların pozulmasının Azərbaycan üçün ağır nəticələri, siyasi məhbuslar mövzusu ətraflı müzakirə edilib.

Azərbaycan ABŞ münasibətlətinin daha da inkişaf etdirilməsi barədə fikir mübadiləsi aparılıb.

Bundan başqa, Hacılı ABŞ Dövlət Departamentinin Demokratiya və İnsan Haqları bürosunun Qafqaz işləri üzrə məsul nümayəndəsi Vendi Silvermanla görüş keçirib. Görüşdə Azərbaycanda və regionda ümumi siyasi vəziyyət müzakirə edilib. Görüşdə həmçinin Azərbaycanda siyasi partiyalar, ictimai təşkilatlar, ayri-ayrı siyasi fəallar üçün yaradılan problemlər, bu problemlərin aradan qaldırılması yolları barədə danışılıb.

Hacılı səfər zamanı həmçinin Azərbaycanın Amerikadakı dostları sayılan bir sıra diplomatlarla və ictimai xadimlərlə, o cümlədən ABŞ-ın Azərbaycandakı keçmiş səfiri Riçard Kozlariçlə, ABŞ-da fəaliyyət göstərən Şərqi Avropada Demokaratiya İnstitutunun (İDEE) direktoru İrena Lasota ilə, həmin institutun rəhbərlərindən biri Erik Çernovetslə, "Azerireport" saytının baş redaktoru Qorxmaz Əskərovla, Güney Azərbaycan Milli Oyanış Hərəkatının lideri Mahmudəli Çöhrəqanlı, Azərbaycan Milli Dirçəliş Təşkilatının sözçüsü Babək Çələbiyani və digərləri ilə görüşüb.

Hacılı bir sıra jurnalistlərlə görüşlər keçirib, "Amerikanın Səsi"nin Azərbaycan xidmətinə müsahibə verib.

Hacılının sözlərinə görə, ABŞ-da bütün görüşləri zamanı o, demokratiya və insan haqları, Qarabağ problemi, ikitərəfli münasibətlər, Güney Azərbaycanda umumi siyasi vəziyyət və s. məsələləri müzakirə edib.

"Bu görüşlər nəinki Müsavat Partiyası və demokratik düşərgənin, bütövlükdə Azərbaycanın maraqları baxımından olduqca səmərəli olub", deyə Hacılı qeyd edib. -06D-