Müsavat Partiyası: Bələdiyyə seçkiləri ədalətli olmayıb

Yanvarın 29-da Azərbaycanda keçirilən bələdiyyə seçkiləri azad və ədalətli olmayıb, əhalinin iradəsini ifadə etməyib. Bu barədə Müsavat Partiyası Mərkəzi Seçki Qərargahının rəyində deyilir.

Sənəddə qeyd olunur ki, seçkilərin keçirilmə tarixi heç bir hüquqi izahat verilmədən bir aydan artıq gecikdirilib. Seçkilər bu dəfə də ölkədə seçkiqabağı demokratik mühitin olmadığı, əksinə repressiyaların daha da gücləndiyi, demokratik qanunvericilik bazasının, bərabərhüquqlu siyasi rəqabət imkanlarının təmin edilmədiyi şəraitdə keçirilib. Seçki ərəfəsində ölkədə sərbəst toplaşma hüququ, söz və ifadə azadlığı təmin edilməyib.

Seçici fəallığı tarixi minimuma enib, seçki məntəqələrinin əksəriyyətində seçicilərin iştirak faizi 5 faizdən aşağı olub. Dairə Seçki komissiyalarının seçici aktivliyi barədə məlumatları dəfələrlə şişirdilib. Eyni seçicilərin müxtəlif məntəqələrdə səs verməsi, “karusel” əməliyyatı və qutulara topa bülleten atılması kütləvi hal alıb. Sosial şəbəkələrdə seçki saxtakarlığını əks etdirən çoxsaylı videolar yayılıb.

Seçki pozuntularını qeydə alan Müsavat Partiyasının müşahidəçiləri, xüsusilə seçki məntəqələrində çəkiliş aparan jurnalistlər təzyiqlərlə üzləşib. Müsavat Partiyasının rayon təşkilatları tərəfindən namizədliyi irəli sürülən 30-a yaxın namizədin heç birinə səsvermənin yekunlarına dair protokol təqdim edilməyib.

Karbonlaşdırılmış protokollar seçki məntəqələrindən asılmayıb. Seçki məntəqələrinin əksəriyyətində səsvermənin yekunlarına dair protokollar, ümumiyyətlə, tərtib edilməyib.

Məntəqə seçki komissiyalarının sədrləri Seçki Məcəlləsinin seçicilərin səslərinin hesablanmasının birbaşa seçkilərə yekun vurulanadək fasiləsiz aparılması barədə 106.5-ci madəsini kobud surətdə pozaraq qeyri-müəyyən müddətə fasilə elan edib, səslərin sabah sayılacağını və bundan sonra protokolların yazılacağını bildirərək müşahidəçilərin məntəqələrdən çıxmasını tələb edib.

Seçki məntəqələrinin əksəriyyətində səsvermənin nəticələri, ümumiyyətlə, sayılmayıb, seçki bülletenləri kisələrə doldurularaq Dairə Seçki Komissiyasına aparılıb.

Seçkilərin ilkin nəticələri seçki qutularında olan bülletenlərin sayılması yolu ilə deyil, yuxarıdan diqtə edilmiş uydurma rəqəmlərə uyğun olaraq elan olunub.

Yanvarın 29-da Azərbaycanda keçirilən bələdiyyə seçkiləri seçkilər azad və ədalətli olmayıb, əhalinin iradəsini ifadə etməyib, sənəddə deyilir.

Müsavat Partiyası bələdiyyə seçkilərinin nəicələrinin ləğv edilməsini, demokratik islahatların, o cümlədən seçki islahatlarının aparılmasını, yeni seçkilərin keçirilməsini tələb edir.