Müsavat Partiyası hakimiyyəti parlament seçkiləri üçün demokratik şəraiti təmin etməyə çağırır

Müsavat Partiyasının İdarə Heyəti sentyabrın 1-nə təyin edilmiş növbədənkənar parlament seçkiləri ilə bağlı mövqeyini müəyyən etmək üçün təşkilatın məclisinin növbədənkənar sessiyasını çağırıb.

Partiyanın İdarə Heyəti bu gün qəbul edilmiş bəyanatda qeyd edir ki, "Azərbaycanda növbəti dəfə səbəbləri barədə heç bir əsaslı izah verilmədən növbədənkənar seçkilər təyin edilib".

"Son illərdə Azərbaycanda keçirilən ümummilli seçkilərdə, referendumlarda olduğu kimi, siyasi qurumlar və cəmiyyətdən gələn çağırışlara baxmayaraq, Milli Məclisə seçkilər ərəfəsində də zəruri siyasi islahatlar həyata keçirilməyib. Seçkiqabağı demokratik şərait üçün zəruri olan hüquq və azadlıqların məhdudlaşdırılması davam etdirlib", deyə sənəddə bildirilir.

Həmçinin qeyd edilir ki, siyasi məhbuslar azadlığa buraxılmayıb, əksinə seçki ərəfəsində siyasi və ictimai fəalların, jurnalistlərin həbsi kütləvi xarakter alıb.

Seçki qanunvericiliyində demokratik dəyişikliklərin edilməsi, proporsional seçki sisteminin bərpası, seçki komissiyalarında iddiaçı tərəflərin təmsilçiliyinin təmin edilməsi çağırışları cavabsız qalıb.

Bundan başqa, partiyanın bəyanatında deyilir ki, seçkilərin əsasən tətillər və havaların çox isti olduğu dövrə təyin edilməsinin seçici fəallığına, seçki kampaniyasının təşkilinə mənfi təsir göstərəcəyi şübhəsizdir.

Müsavat Partiyası indiki şəraitdə ölkədə qismən də olsa demokratik seçkilərin keçirilməsinin tarixi zərurət olduğunu xatırladaraq, Azərbaycan hakimiyyətini seçki ərəfəsi və seçki kampaniyası dövründə demokratik mühitin yaradılması naminə vətəndaşların sərbəst toplaşma hüququnun, söz və ifadə azadlığının təmin edilməsi, bütün siyasi məhbusların azadlığa buraxılması, seçki komissiyalarının fəaliyyətinə etimadın artırılması üçün əməli addımlar atmağa çağırır.