Müsavat Partiyası: Həbib Müntəzirin fikirlərinin rəsmi təsdiqi yoxdur

Bakı/16.11.19/Turan: Müsavat Partiyasının mətbuat xidməti son günlər AFR-dən Azərbaycana qeyri-leqal miqrasiyada ittiham olunan şəxslərin Almaniyada saxlanması ilə bağlı partiyanın ünvanına səslənən ittihamlarla əlaqədar  bəyanat yayıb.

Əməliyyat zamanı hər hansı  Müsavat Partiyası üzvünün saxlanıldığı barədə iddia rəsmi təsdiq olunmayıb. Bu fikri ilk olaraq bloger Həbib Müntəzir yayıb. O, Müsavat Avropa Koordinasiya  Mərkəzinin rəhbəri İlham Həsən,  onun “müavini” Mehdi Xəlilbəyli, həmçinin fəallar Abdin Cavadov, Rəşad Məmmədov, Elşən Abdullayev və Elçin Əkpərovun adlarını sadalayıb.

Öz növbəsində Müsavat Partiyası dəqiqləşdirib ki, Mehdi Xəlilbəyli təşkilatda hər hansı vəzifə tutmur, adları çəkilən digər şəxslər isə Müsavat üzvləri deyil. 

Bundan əlavə, Rəşad Məmmədov nəinki Koordinasiya Mərkəzinin üzvü deyil, hətta uzun müddət Müsavat  Partiyasına qarşı kampaniya aparıb.

Digər tərəfdən, onların saxlanmasına rəsmi təsdiq yoxdur.   

H.Müntəzir “Koblens məhkəməsinin sənədi ” kimi təqdim etdiyi hansısa mətnə əsaslanır. Lakin bu vərəqdə nə möhür, nə imza, nə də başqa rekvizit var.

Bundan əlavə, “sənəd”də yazılanların bir çoxu silinib ki, bunun kimin tərəfindən, hansı məqsədlə silindiyi izah olunmayıb. 

Müsavat Partiyası qanunsuz miqrasiya və saxta sənədlərin verilməsi ilə bağlı obyektiv araşdırmaların aparılmasında maraqlıdır.  Əgər Almaniya polisinin həyata keçirdiyi əməliyyat nəticəsində hər hansı bir Müsavat Partiyası üzvünün qanunsuz fəaliyyəti aşkar olunarsa həmin şəxs buna görə şəxsi məsuliyyət daşıyacaq. Bundan əlavə, Müsavat Partiyası həmin şəxsin barəsində adekvat tədbirlər görəcək, bəyanatda deyilir.–06D-