Media-icmal 16.11.19

Azərbaycanın regionun tranzit imkanlarından yararlanması, seriallarda aktyor-prodüser münasibətləri, tikinti şirkətlərinin sadələşdirilmiş vergiödəyicisi olmaq hüququnun ləğvi və s. məsələlər bugünkü medianın aparıcı mövzuları sırasındadır.

Qafqazın tranzit mərkəzlərinin qovşaq mərkəzi

“Azərbaycan” qəzeti “Ölkəmiz regiondakı əlverişli imkanından səmərəli istifadə edir sərlövhəli məqalədə ölkənin yerləşdiyi regionun imkanlarından yararlanmasını dəyərləndirir. 

Müəllif deyir ki, Azərbaycan  Qafqazda Şərq-Qərb, Şimal-Cənub marşrutunun əsas qovşaq mərkəzidir.

Yazıda vurğulanır ki, Azərbaycanın qədim İpək Yolunun bərpasında təşəbbüskar ölkə kimi çıxış ettməsində də məqsəd bu coğrafi imkandan istifadə edərək dünyanın ən işlək tranzit marşrutlarından birinin Azərbaycandan keçməsinə nail olmaq idi.

Müəllif əlavə edir ki, noyabrın 13-də prezident İlham Əliyev “Azərbaycan Dəmir Yolları” QSC-nin sədri Cavid Qurbanovu qəbul edərkən ölkədə həyata keçirilən infrastruktur layihələrinin beynəlxalq əhəmiyyət daşıdığını bir daha vurğulayıb.

Məqalə müəllifi hesab edir ki, bu nailiyyətlərin qazanılması dövlət başçısının son 16 ildə gördüyü böyük işlərin real nəticəsidir.

Müəllif əlavə edir ki, Azərbaycan yeganə ölkədir ki, həm “Şərq-Qərb”, həm  də “Cənub-Şimal” dəhlizləri layihəsində iştirak edir.

Müəllif vurğulayır ki, ötən il “Şimal-Cənub” nəqliyyat dəhlizi vasitəsilə daşınan yüklərin həcmi 8 dəfə, cari ilin 9 ayında isə daha 70 faiz artıb, üstəlik   “Şimal-Cənub” dəhlizi Azərbaycanda daha iki istiqamətdə - Şimal-Qərb, Şərq-Qərb marşrutu üzrə fəaliyyət göstərir.

Müəllif hresab edir ki, Azərbaycan həm də bu marşrut xətlərini özündə cəmləşdirən mühüm nəqliyyat qovşağıdır, belə coğrafi imkan, üstəgəl yüksək inkişaf etmiş infrastruktur Azərbaycanı dünyada etibarlı tranzit ölkə kimi tanıdır.

Müəllif deyir ki, daxili dəmir yolu xətləri də diqqət mərkəzindədir, belə ki, hazırda 12 min sərnişin daşınır, gələcəkdə isə 25-30 min sərnişinin daşınması nəzərdə tutulub.

Yazıda deyilir ki, Bakı və Abşeron marşrutlarının dəmir yolu üzrə işlərin 80, elektrik, rabitə və işarəvermə işlərinin isə 70 faizi yerinə yetirilib, 11 yeni modern stansiya tikilib. Yol üzərində 18 piyada və 16 avtomobil keçidi inşa olunub, yolboyu çirkab və tullantı suları yığışdırılıb.

Müəllif deyir ki, Bakı-Gəncə dəmir yolu artq fəaliyyət göstərir, 2020-ci ildə Ləki-Qəbələ dəmir yolunun istifadəyə verilməsi planlaşdırılır, bundan başqa dünyanın ən böyük qış-xizək istirahət mərkəzi olan Şahdağa da dəmir yolu çəkilməsi nəzərdə tutulub.

Müəllifə görə, beləliklə, dəmir yolu şəbəkəsi ölkə ərazisində yük və sərnişinlərin daşınması üçün mükəmməl səviyyəyə çatacaq.

Aktyor nədən narazıdır?

“Oxu.az”da isə “ Aktyor “alov püskürdü”: Prodüserlər haqqımıza girməklə pul qazanırlar” sərlövhəli məqalə oxumaq olar.

Müəllif Azərbaycanda serialların çəkilişlərində prodüser-aktyor münasibətləri barədə aktyor Fərhad Səmimi ilə söhbətləşir. 

F.Səmimi “oxu.az”a bildirir ki, prodüserlər aktyorları istismar etməklə, haqlarına girməklə pul qazanırlar: “Belə biznes olmur! Gəl, çalış-vuruş, söhbət pula gələndə “kanal ödəmədi”, “dövlət pul ayırmadı” və ya “ayırıb, amma gecikir” kimi şeylər deyə-deyə hamam suyu ilə pul qazanırlar. Pul qazanan adam sərmayə qoyub, götürür. Bunlar kimi yox, Onlar artıq prodüser yox, “makler” adlanır”.

Aktyora görə, problem çox böyükdür, odur ki, prodüserlər xaric aktyor, rejissor və ssenaristlərdən ibarət bir konfrans keçirilməlidir. “Çünkü prodüserlər bizim xeyrimizə heç nə deməyəcək və etməyəcəklər”, - aktyor bildirib.

F.Səmiminin sözlərinə görə,  seriallarda heç bir əsası olmadan, xronometraj uzansın deyə lazımsız və məntiqsiz səhnələrlə üzləşirlər: “Ssenaristlər də ona görə dəvət olunmalıdır ki, onlara da tutulan əsaslı iradlardan nəticə çıxarsınlar. Çünki şəxsən, mən bilmirəm rolumu oynayım, ya ssenaridə müəyyən dəyişikliklər olunmasını təklif edim”.

Aktyorun deməsinə görə, heç bir əsas olmadan, xronometraj uzansın deyə lazımsız və məntiqsiz səhnələrlə üzləşirlər: “Heç kim sinəsinə döyməsin. Sadəcə, bu gün bir çox qruplaşmış qüvvələr var ki, deyirlər serial bazarında bizik, Bağdadda kor xəlifə. Dərd orasındadır ki, onların quluna çevirilmişlər çoxdur - bir tikə çörəyə görə şərəfindən və ləyaqətindən keçənlər!”.

İstehlakçıya dəyən zərbə

“Azpolitika.info”da isə  “Bu dəyişiklik mənzillərin qiymətini bahalaşdıracaq” sərlövhəli məqalə diqqəti cəlb edir.

Müəllif tiktinti şirkətlərinin sadələşdirilmiş vergi ödəyicisi statusunun ləğv olunması, bunun mahiyyəti barədə ekspert Rövşən Ağayevlə söhbətləşir.

R.Ağayevin “azpolitika.info”ya açıqlamasına görə, tikinti şirkətlərinə artıq sadələşdirilmiş vergi ilə işləmək imkanı verilməyəcək.

Ekspert hesab edir ki, bu isə o deməkdir ki, əsasən də kiçik dövriyyə ilə işləyən, yəni xırda və orta ölçülü sahibkarlar istehlakçıdan daha çox vergi almalı olacaq.

Müəllif deyr ki, R.Ağayev bu fikri Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadənin bu günlərdə parlamentdə səsləndirdiyi açıqlamasını şərh edərkən bildirib.

R.Ağayev vurğulayır ki, komitə sədri gələn ildən tikinti şirkətlərinin sadələşdirilmiş vergi ödəyicisi olmaq hüququnun ləğv ediləcəyini açıqlayıb. (Ziyad Səmədzadənin açıqlamasının tam mətini bu linkdə: http://azpolitika.info/?p=569215)

R.Ağayev vurğulayır ki, indiyə qədər tikdikləri mənzillərin dəyərindən 4 faiz sadələşdirilmiş vergini son istehlakçıya yönəldirdilər, indi 18 faizini onlardan alacaqlar.

Ekspertin sölzərinə görə, burada itirən ancaq vətəndaş, istehlakçı olacaq. 

“Bu, xüsusilə də şəhər ətrafında, Xırdalan, Masazır, Binəqədi və digər ərazilərdə fərdi evlər, yaxud 3-4 mərtəbəli binalar tikib əhaliyə satan sahibkarların satdığı mənzillərin qiymətinə öz təsirini göstərəcək. Onsuz da iri şirkətlər əlavə dəyər vergisi ilə işləyirdi. Nəticə etibarı ilə xırdalar böyüklər qarşısında rəqabətdə əlverişsiz duruma düşəcəklər”, - R.Ağayev əlavə edib.