Müsavat Partiyası ilk məsləhətləşməni Xalq Cəbhəsi Partiyası ilə aparacaq

Müsavat Partiyası rəhbərliyi ilk məsləhətləşməni dekabrın 13-də Xalq Cəbhəsi Partiyası ilə aparmağı nəzərdə tutur. Bu açıqlamanı Turan-a Müsavat Partiyası Mərkəzi İcra Aparatının rəhbəri Arif Hacılı verib.

A.Hacılının sözlərinə görə, bu müzakirələrin həm Milli Şura daxilində, həm də  ondan kənarda olan siyasi qüvvələrlə aparılması nəzərdə tutulur. Müzakirələrin aparılması üçün hər hansı konkret sıralama yoxdur. 

O qeyd edib ki, bu müzakirələrin aparılması zərurəti 9 oktyabr prezident seçkilərindən sonra yaranan yeni siyasi situasiya ilə bağlıdır. Bir çox məsələlər var ki, mətbuat üzərindən yox, siyasi qüvvələrin canlı təması ilə müzakirə edilməlidir. Həm də bu bütün dünyada qəbul edilən qaydalardan biridir. 

A.Hacılı bir çox mətbuat qurumlarının bu müzakirələrin Milli Şura ilə bağlı olması haqda mövqelərini əsassız adlandırıb. “Bir daha təkrar edirəm ki, bu, prezident seçkilərindən sonra yaranan yeni siyasi situasiya ilə, bu situasiyada mövqelərin müəyyən olunması ilə bağlıdır”, - A.Hacılı müzakirələrin mahiyyətini barədə mövqeyini izah edib.

Müsavat partiyasının Divanı 9 oktyabr prezident seçkilərindən sonra ölkədə yeni siyasi situasiyanın yaranmasını əsas gətirərək ölkənin aparıcı müxalif ictimai-siyasi qüvvələri ilə məsləhətləşmələrin aparılması haqda dekabrın 9-da qərar qəbul edib. Bu sırada ilk məsləhətləşmə AXCP ilə olacaq. -05B-