Müsavat Partiyası P.Həşimliyə azadlıq tələb edir

Müsavat Partiyası jurnalist və hüquq müdafiəçisi Pərviz Həşimlinin həbsilə bağlı bəyanat yyaıb. 

Müəlliflər sentyabrın 17-də “Bizim yol” qəzetinin əməkdaşı, moderator.az saytının redaktoru, AXCP Ali Məclisinin üzvü Pərviz Həşimlinin Milli Təhlükəsizlik Nazirliyi tərəfindən həbs edildiyini nəzərə çatdırır. Daha sonra diqqəti həbsdən sonra jurnalistin evində, “Bizim yol” qəzetinin redaksiyasında və moderator.az saytının ofisində aparılan axtarışa çəkir. P.Həşimliyə Cinayət Məcəlləsinin 206.3.2 və 228. 2.1-ci (qaçaqmalçılıq və qanunsuz silah əldə etmə) maddələri ilə cinayət işi qaldırıldığı qeyd edilir. Müəlliflər jurnalistin yaxınlarına isnadən onun evindən narkotik və silah tapılması haqda protokol tərtib olunduğnu bəyan edirlər. 

Müəlliflər bu həbsi siyasi sifarişin nəticəsi sayır, ittihamları uydurma adlandırır. Seçki ərəfəsində iqtidarın həyata keçirdiyi bu hay-küylü həbsin cəmiyyətdə qorxu hissini gücləndirməyə xidmət etdiyi qeyd olunur. Sənəddə deyilir ki, iqtidar ictimai-siyasi fəalları, jurnalistləri qanunsuz həbsə atmaqla gündən-günə artan siyasi fəallığın qarşısını almağa çalışır. 

Müəlliflər P.Həşimlinin dərhal azadlığa buraxılmasını tələb edərək, iqtidarın belə üsullarla xalqın gündən-günə artan narazılığnın qarşısını almağa  nail olmayacağını bəyan edirlər. -05D-