Müsavatçılar sərbəst buraxılıb Video (YENİLƏNİB)

Bakı/05.10.19/Turan: Oktyabrın 5-də Cəlilabadda Müsavat Partiyasının başqanı Arif Hacılı ilə görüş zamanı Müsavat başqanının müşaviri Hidayət İsmayılov, rayon təşkilatının sədri Azər Əsgər, NTK sədri Akif Bədirli və Şura üzvü Rüstəm Rüstəmov saxlanıldıqdan sonra polis şöbəsinə aparılıblar.

Bu barədə Turana məlumat verən partiyanın mətbuat xidmətinin rəhbəri Mustafa Hacıbəylinin deməsinə görə, Hidayət İsmayılov polis şöbəsində görüşlə bağlı sualları verəndən sonra sərbəst buraxıb.

Daha sonar digər fəallarda buraxılıb.

Arif Hacılı ilə Cəlilabad rayonunda keçirilən görüşdən qayıdan partiyanın Masallı təşkilatının sədri Allahverdi Rəhimli, sədr müavini Ramiz Abdulla və bir neçə fəal Masallı rayonu ərazisində saxlanaraq, bu rayonun polis şöbəsinə aparılıb. Onlar da sorğu-suala tutulduqdan sonra sərbəst buraxılıblar".-021B-

* * *

2019 Oktyab 05 (Şəmbə) 19:20:39

Cəlilabadda müsavatçılara hücum (Video)

Bakı/05.10.19/Turan: Bu gün Azərbaycanın cənubunda Cəlilabad şəhərində Müsavat Partiyasının başqanı Arif Hacılıya və təşkilat üzvlərinə hücum edilib. Bu barədə Hacılı özü bildirib.

Onun sözlərinə görə, yerli fəallarla görüşdə 20-yə yaxın polis əməkdaşı və mülki geyimli şəxs toplantı keçirilən yerə hücum edib.

"Onlar bizdən toplantını dayandırmağı və otaqdan çıxmağı tələb etdi. Müsavatçılar çıxmaq istəmədi, mən də polisin nəzərinə çatdırdım ki, onların partiyaya aid olan tədbiri bu şəkildə dayandırmaq səlahiyyətləri yoxdu. Lakin polis qarşıdurmaya getdi. Bir neçə Cəlilabad müsavatçısı saxlanıldı. Sonra məlum oldu ki, mənimlə görüşə gələn Masallılı müsavatçılar polis şöbəsinə aparılıb", deyə Hacılı bildirib.

Müsavat başqanının içərisində olduğu avtomobil də hücuma məruz qalıb.

"Cəlilabaddan Bakıya gedərkən yolda bizi qırmızı "Mazda" təqib edib, ondan maşınımıza yumurta atıblar və təhdid ediblər", deyə Hacılı Turan agentliyinə bildirib.

Cəlilabad rayon polis şöbəsindən şərh almaq mümkün olmayıb.

Xatırladaq ki, oktyabrın 4-də Müsavat başqanlığına namizədlər Tofiq Yaqublu və Yadigar Sadıqlı Qəbələdə saxlanılıb, Xaçmazda isə Hacılı ilə görüşün iştirakçıları profilaktik söhbət üçün polisə çağırılıb.

Regionlarda görüşlər Müsavatın oktyabrın 12-nə təyin edilmiş qurultayına hazırlıq çərçivəsində keçirilir. -06D-