Müxalifət mitinqinin iştirakçıları korrupsiyanı qınadılar

Bakı/07.10.17/Turan: Müxalifətin "Korrupsiyaya son, siyasi məhbuslara azadlıq!" şüarı ilə keçirilən mitinqi başa çatıb.

Aksiyada çıxış edən AXCP lideri Əli Kərimli bildirib ki, hakimiyyət hər vəchlə müxalifətin mitinqlərini pozmağa çalışır. Onun sözlərinə görə, son həftələr 200-ə yaxın fəal saxlanılıb, polisə çağırılıb. 16 nəfər inzibati həbsə məruz qalıb.

Ə.Kərlimi hesab edir ki, hakimiyyət mitinqin təşkilatçılarını həbs edə bilər, ancaq o, xalqın gücü qarşısında acizdir və kütləvi aksiyaların qarşısını ala bilməyəcək.

O, beynəlxalq səviyyədə tənqid obyektinə çevrilmiş hakimiyyəti korrupsiyaya görə tənqid edib.

"Biz beynəlxalq birlikdən Azərbaycandan 3 mlrd. dolların yuyulması ilə bağlı qalmaqalın sonadək araşdırılmasını və günahkarların cəzalandırılmasını gözləyirik",- Ə.Kərimli vurğulayıb.

O, Qarabağ probleminin həlli istiqamətində hakimiyyətin siyasətini tənqid edib və bildirib ki, müdafiəyə ayrılan vəsait keyfiyyətsiz silahların alınmasına sərf edilib.

Həmçinin Ə.Kərimli siyasi məhbusların azadlığa buraxılmasını tələb edib.

DQMŞ-nin sədri Cəmil Həsənli Azərbaycanda korrupsiyanın ən yüksək səviyyədə olduğunu bildirərək hakimiyyəti "kleptokratik" adlandırıb.

Onun sözlərinə görə, Azərbaycanı "nazirlər-oliqarxlar hökuməti" idarə edir.

C.Həsənli siyasi məhbusların azadlığa buraxılmasını tələb edib.

C.Həsənlinin çıxışı zamanı stadionda beş dəqiqəyə yaxın elektrik enerjisi verilməyib.

Aksiyanın qətnaməsi oxunarkən "oğurlanmış 2.9 mlrd.-ın" ölkəyə qayrarılmasının tələb olunduğu məqamda elektrik enerjisi yenidən kəsilib.

DQMŞ həmin faktların araşdırılmasını tələb edib və növbəti mitinqi 28 oktyabr saat 15:00-a təyin edib.-03B06--

* * *

2017 Oktyab 07 (Şəmbə) 17:15:12

Müxalifətin mitinqi başlayıb

Bakı/07.10.17/Turan: Saat 15:00-da Yasamal rayonu stadionunda (keçmiş adı "Məhsul") müxalifətin "Korrupsiyaya son, siyasi məhbuslara azadlıq!" şüarı ilə çoxminlik mitinqi başlayıb.

Demokratik Qüvvələrin Milli Şurasının təşkil etdiyi aksiyada digər siyasi partiyaların və ictimai təşkilatların nümayəndələri iştirak edirlər.

Sosial şəbəkələrdə vətəndaşları mitinqə çağırışla bağlı fəal təşviqat aparılıb.

Eyni zamanda hakimiyyət aksiyanın kütləviliyinin qarşısının alınması üçün tədbirlər görüb: həftə içi saxlanmalar, həbslər, polisə çağırışlar, AXCP, ADP, KXCP, "Müsəlman Birliyi" Hərəkatı və s. nümayəndələrinin işdən çıxarılmasına dair məlumatlar daxil olub.

Xatırladaq ki, müxalifət sentyabrın 23-də də analoji şüar ilə mitinq keçirib.

Mitinqdə Azərbaycanın Böyük Britaniyada qeydiyyatda olan şirkətlər vasitəsilə pulları yumasına dair OCCRP beynəlxalq jurnaistika şəbəkəsinin araşdırmasında göstərilən faktların Azərbaycan prokurorluğu tərəfindən araşdırılması tələb olunub.-06B-