Müxalifətin şənbə aksiyasının 10 iştirakçısı inzibati qaydada həbs olunub

Şənbə günü parlamentin buraxılması tələbilə keçirilən aksiyanın 10  iştirakçısı 5-7 sutka inzibati cəzaya məruz qalıb.

AXCP fəalları Məmməd İbrahim, İnqilab Kərimov, Zülfüqar Eyvazlı (keçmiş vicdan məhbusu, Babək Həsənov (keçmiş vicdan məhbusu) və Dəyanət Babayev, həmçinin Demokrat Partiyasının üzvləri Hafiz Adıgözəlov 7 sutka həbs olunub.  ADP gənclər təşkilatının rəhbəri Cəmil Hacıyev, Müsavat Partiyasının fəalı Elçin Cərulla və bitərəf Məhəmməd Əliyev 5 sutka həbs olunub. 

Aksiya zamanı 65-ə yaxın adam saxlanılıb. Sözügedən 10 nəfərlə yanaşı qalanları 12-25 manat arasında cərimələnərək azad edilib. 

Aksiya zamanı bəzi müxalifətçilərə bədən xəsarətləri yetirilib. 

AXCP sədrinin müşaviri Gözəl Bayramlının qolu sındırılıb. Qeyd edək ki, müraciətinə baxmayaraq, ona tibbi yardım göstərilməyib.

Xatırladaq ki parlamentin buraxılmasına tələbinə keçmiş deputat Gülər Əhmədova ilə Azərbaycan Beynəlxalq Universitetinin keçmiş rektoru Elşad Abdullayev arasında söhbətin videosu səbəb olub. Söhbət zamanı sonuncunun deputat seçilməsi üçün məbləğin həcmi müzakirə olunur. Müxalifət hesab edir ki, bu video parlament seçkilərinin saxtalaşdırılmasına və deputatların əvvəlcədən təyin edilmiş siyahı üzrə seçilməsinə sübutdur.-06D--